The Role of Pastors’ Wives in Church and Society

Lalhmangaihpari

Lalhmangaihpari, B.A., B.D. Secretary, SS Deptt., ECM Assembly Office, Siaha.

 INTRODUCTION: Kan Kohhran ECM Assembly hruaituten Pastor nupuite tan Seminar a buatsaih hi a lawmawm tak zet a. He Seminar hi a pawimawh hle a, a pawimawh em avangin Pathianin mal a sawm ang a, rah tha a chhuah ngei pawh ka beisei tlat a ni.

Kan thupui tur hi “The Role of Pastors’ Wives in Church and Society” tih a ni a, a awmzia chu “Kohhran leh Khawtlanga Pastor nupuite tih tur chanvo” tih a ni. Kohhran leh Khawtlanga Pastor nupuite mawhphurhna (responsibility) pawh kan ti thei ang chu. He thupui hi a pawimawhin a huam zau hle mai a. He Paper-ah hian ziak kim vek theih a ni lo va. A pawimawh zual nia ka hriatte ka rawn tarlang a. Engpawh ni se, kan zingah hian tawn hriat (experience) ngah tak tak in awm nual tih ka hria a, chuvangin, he Paper aia tha zawk, thil dang tam tak te pawh kan sawiho theih ka beisei bawk a ni.

Bible ah hian hmeichhe tha leh tha lo, fing leh fing lo, rinawm leh rinawm lo chanchin tam tak kan hmu a. Thufingte buah hian hmeichhe tha leh thalo chungchang kan hmu nual bawk a, 14:1 ah chuan , Hmeichhe fing zawng zawngin in an sa a, a a erawh chuan anmahni kut ngeiin an thiat thin” a ti a. Tin, 12:4 ah chuan “Hmeichhe khawsak tha chu a pasal tan lallukhum a ni” a ti a. Tin, 31:30 ah, “Lalpa tihtu hmeichhia erawh chu fak a ni ang” a ti bawk a ni. Chuvangin Lalpa ngaiha hmeichhe fel tak chu khawvel thila fing leh lehkhathiam sang te hi an ni ber lo a, Lalpa tihtu, pasalte tawiawm ching mi, mi taima te hi an ni zawk a ni tih a chiang hle a ni.

Pastor te hi Pathian, Lei leh vana lalberin a rawngbawl tura a ruat te leh a kohchhuah te an ni. Puithiam, Kohhran enkawltu leh kaihruaitu ber an ni a, rinna kawnga mite kaihruaitu leh mite kawng dik kawhhmuhtu an ni. Rawngbawlna serh leh sang zawng zawng te khawihin, kawng hrang hrangin a tul dan ang zelin Pathian leh a Kohhran tan rawngbawltu an ni a, chutiang taka mi pawimawh chu an ni a.

Pastor nupuite hi chutiang taka Pathian mi pawimawh te Nupui ni tura Pathianin min ko ve hi a lawmawm in a ropui takzet a ni. Nupa chu pumkhat kan nih avangin kan indahhrang thei lo, Pastor nupui kan nih avangin kan mawhphurhna pawh a sang ve hle a ni tih kan hriat a, kan pawm a ngai a ni. A chhan chu pasal (Pastor) te hi kan enkawl dan leh kan tawiawm dan a zirin, kan timualpho theiin, kan tiropui thei a ni. Chuvangin kan pasal (pastor) te hi rawngbawltu hlawhtling tak an nih theih nan, nasa taka tan lakpui hi kan tihtur pui ber chu a ni.

1. KOHHRANA PASTOR NUPUITE TIHTUR (MAWHPHURHNA) : Kawng hrang hrang sawi tur a awm ang a, kawng 7 han sawi ta ila:

 (a) Inpekzawhna : Pastor nupui tan thil pawimawh ber chu “Commitment” (Inpekzawhna, intiamna) hi a ni. Commitment nei lem lo pawhin Pastor nupui nih ve satliah chu a harsa lo pawh a ni thei. Amaherawh chu, inpekzawhna tak tak tel lo chuan Pastor nupui nih hi thil harsa tak leh peihawm loh tak a ni. Keini ho hi engchennge kan commitment ni ang aw?

Kan Pasalte hi Pastor an ni a, rawngbawltu an ni a, chhiatni thatniah te, kohhran leh khawtlang thiltihnaah an chhuah reng a ngai a. Keini hi an kaiza vengtu leh thachhangdawltu chu kan ni. Chuvangin keini ho hi kan pawimawh hle a ni. Pasalte rawngbawlna tithuanawptu ni lova, tichaktu kan nih zel theih nan Pathian hnenah tawngtaia, kan inhlan a, kan inpek a, kan intiam thar zel a pawimawh hle a ni. A hrehawmah pawh a nuamah pawh Lalpa rawngbawl a, pasalte tichaktu ni tura kan inpek a tul takzet, chutilo chuan mualpho a hlauhawm.

Pastor nupui chu, commitment nei tha, mi piangthar, tawngtai ngaina mi  a ni tur a ni a,  mi inpe zo, Pasal te rawngbawlnaa theih tawp chhuahpuitu, an chauh chang leh buai deuh chang pawha tichaktu nih a ngai a ni. Tin, Pastor te hi rawngbawla an chhuah chuan, inlam hi an ngaihtuah hman tawh lo. Inchhungkhur buaina leh harsatna te chu nupuite kutah an dah tawp mai a ni. Chuvang chuan, Lal Isua Krista kan tan a inpekzawhna hre reng chungin Lal Isua tan leh Pasal te tan kan inpekzawh ve a ngai a, hmeichhe chhel tak, dawhthei tak, khawsak thiam, leh rorel  thiam kan  nih a tul hle a ni.

Tin, tunlaiah mi tam tak an kawppuite rinawm loh avangin harsatna tawk a, nupa inthen sawi tur an tam, chuvangin hmeichhe tam tak chuan pasal atan Pastor an duh tawh hle a ni. Keini chu Pastor nupui kan ni thei a, kan vannei tak zet a ni. Chuvangin, pasal te rawngbawlnaah tun aia nasa lehzuala kan tawiawm a, Pathian hnenah kan inpumpek leh zual a pawimawh hle a ni. “He rilru Krista Isua pawha awm bawk kha, nangmahniah awm rawh se….” (Phil.2:5ff).

(b) Inkhawm: Kohhran hi mahni ta anga ngaih tur a ni. Kohhran Inkhawm, KNP inkhawm, Committee, etc. ah te chanvo kan nei emaw nei lo emaw, ngaih pawimawh hle tur a ni. Inkhawmna leh zaikhawmna, Sunday School, Committee meeting a kal hian hun vawn dik tur a ni. Tlai emaw haw hma emaw chin loh tur a ni.

Kohhran mipuite hian Pastor nupuite hi kan inkhawm leh inkhawm loh te an chhiar ve reng thin. Chuvangin, pastor nupui nih a, dam that bawk chuan, peih vak loh chang pawhin inkhawm leh Kohhran programme ngaih pawimawh a, tel hram hram tur a ni. Inkhawmnaah te thusawi ngun taka ngaihthlak tur a ni a, bula mite biaka, titipui sur sur hi a mawi lo duh hle.

Chhangchhiat lai chuan inkhawm hi a harsa a, nau nen chuan chhun inkhawm kan thu tha hlei thei lo va, zan inkhawm phei chu kan ti  theilo leh zual tlangpui thin. Chhangchhiat lai chuan a zawng zawnga inkhawm chu duh hle pawh ni ila kan inkhawm tam thei chuang lo. Chuvangin chhangchhia kan inkhawm tam theilo a nih pawhin, in lamah fate thahnemngai takin Pathian thu leh tawngtai dan te kan zirtir zawk tur a ni a. Bible chang vawntir te, tawngtai dan zirtir te, Pathian hla zirtir te kan uar tur a ni a, Chu chuan an hmalam hunah nasa takin a hruai tha thei dawn a ni.

Kan chhangchhe tawh lo a, kan dam tha a nih bawk chuan inkhawm kan thlahthlam loh a tha hle a ni. Tin, mi Inkhawm ngailo te pawh inkhawm turin kan sawm ang a, kan hruai thin tur a ni.

(c) Pasalte thusawi tawiawm: Damlohna leh engemaw rokhawlhna a awm te a nih loh chuan Pasal te thusawiah inkhawm ngei ngei tur a ni. An thusawi ngun takin kan ngaithlaksak ang, mutthluksan mai mai loh tur. A chhan chu a thusawi kha a thatna lai kan faksak ang a, a that lohna lai leh fimkhur ngai thil te kan chhinchhiah bawk tur a ni. Pasal te thusawi chu a him tawk em tih te, belh ngai leh sawi uar tulna lai te pawh kan chhinchhiahsak tur a ni a, chutiang te chu  in lamah tha takin kan sawipui thin tur a ni.

Pasal (pastor) te thusawi hi midang chuan a lang a pauvin an sawisel duh kher lo. Chuvang chuan, a tha vek tihna a ni chuang lem lo. Chuvangin, inkhawm tama kan ngaihthlak tam loh chuan, sawi (comment) tur kan hre ngai vak lovang. Tin, keini nupuite hi kan pasal te hrechiangtu ber kan nih avangin, kan hneh thei ber a, kan siamtha thei ber bawk tih hi i hre reng bawk ang u.

(d) Pathian Rawngbawlna : Kan pasalte kan tawiawm a, kan zui ve a, an rawng kan bawl a, kan chhawmdawl that hian Pathian rawng kan bawl tihna a ni. Tisa leh Thlarauah Pastor te tanpuitu ber kan ni a, keimahni avangin kan pasal te hian an rawngbawlnaah harsatna an nei tur a ni lo, harsatna leh buaina kan siamsak tur a ni lo. Rawngbawla an chhuah zel theihna turin kan tanpui reng zawk tur a ni a. Kan tawngtaisak reng tur a ni.

Khawvela rawngbawltu hlawhtling leh hmingthang tak Rev. Dr. Billy Graham-a chu a rawngbawlna hlawhtlinna chhan an zawt a. Ani chuan, “Ka nupui – Ruth Bell Graham-i khup saw va en rawh u. Ka tan a rinawmna leh a tawngtaina avangin a khup saw a belkang vek tawh a ni. A tawngtaina avang chauhvin ka rawngbawlna hi hlawhtling thei a ni a sin!” tiin a sawi.

Kan pasal te (Pastor te) rawngbawlna hlawhtling tur chuan, keini an nupuite hian a zawng zawngah kan zui zel thei lo a nih pawhin, tawngtaina nen kan tawiawm that a, full support kan pek reng a pawimawh tak meuh a ni, chu chu kan tihtur leh Pathian rawng kan bawlna pawimawh em em chu a ni.

Tin, Chhungkua leh pasalte rawng kan bawlna piah lamah Kohhranah te, hmun dangah te englaipawhin tawngtai leh thusawi rawngbawlna nei ve thei reng dinhmuna ding kan nih avangin kan inbuatsaih a, kan inrin ve reng a ngai bawk.

(e) Thawhlawm thawh kawngah : Kohhrana Thawhlawm chi hrang hrang thawh kawngah Pastor nupuite hi Kohhran mite entawntlakin kan thawh ve tur a ni. Mi tam takte chu indaih lohna avangin Kohhrana thawh tur – sawma pakhat, buhfaitham, target, mission, building, tanpuina, etc. te kan thawh tam thei lo. Thenkhatte erawh chu thil phal lo leh sum ren lutukna avangin an thawh tam thei lo bawk.

Kan pasal Pastor te hi an hlawh a tam lo tih chu hriatsa a ni. Amaherawhchu, kan thawh tlem bik lutuk a nih chuan, midang ten min hmusit thei a, chubakah Pathian tan kan thil phal loh zia tihlanna mai a ni. Chuvangin, a thawh tam ber chu kan ni thei kher lo ang, a tlem ber te zinga mi nih erawh chu tum lo ang u. A awm tawk talin kan thawh ve tur a ni. Midangte hmusit tur khawpin, thilpek leh thawhlawm thawhna kawng hrang hrangah hian uikawm lutuk lo turin kan infuih a ni.

(f) Bengvarna lam: Bengvarnaah hian a tha zawng leh a tha lo zawng a awm a, bengvarna tha lamah chuan- Pastor nupui chuan Kohhran kalphung te, inkaihhruai dan te, Constitution & Rules te pawh a tlangpui tal chu hriat ve tur a ni, Pasalte pawh zawh theih a ni a, mahniin kan chhiar zau ve tur a ni. Tunlaiah mi an fing tawh a, chuvangin keini pawh thil chinchang hre lo lutuk leh mawlmang lutuk chuan awm bik loh tur a ni a, kawng engkimah fin kan tum tur a ni a, lehkhabu chhiar zau a pawimawh hle a ni. Tin, Bible chhiar leh Bible hrilhfiahna Bu te, Lehkhabu tha chi hrang hrang te pawh a tam thei ang ber kan chhiar thin tur a ni. Midangte rawn tlak nih tum tur a ni.

Bengvarna tha lo lamah chuan, heng- Mi chanchin tha lo sawi te, mi rel te, kam tam te, pasalte committee thurel te lo sawi chhuah te, thil intihre taka mi thusawi laia lo inrawlh ve zung zung ang chi te hi chin loh tawp tur a ni. Tin, Kohhrana T.Upa, Upa, KNP, etc. hruaitu thlanna (election) neih lai te hian a campaign zawng emaw, duh zawng leh duh loh zawng neia, midangte bulah sawi ve chiam chiam loh tur a ni.  Ngawi renga tawngtaina nen vote pek mai tur a ni.

(g) Rawngbawlna dang: Kan bial chhungah emaw, kan veng chhungah emaw, veng dangah pawh ni se, rawngbawlna tur a awm phawt chuan tihhlawhtlin hram hram zel tur a ni. Heng vantlangin misuala an ngaih- Mi awmtha duh lo te, zu rui te, zu zuar te, drug ti te, drug zuar te, rukru te, etc. hi kan theih phawt chuan an inah te tlawh a, tawngtaisak thin tur a ni. U sawmi nu chuan, “kan ar rutu kha chaw eiah kan sawm a, a tan kan tawngtaisak bawk a, tichuan a sim a, tunah phei chuan Evangelist a ni tawh a” a ti a ni. Chutiang tak chuan keini pawhin tun aia nasa leh zualin rawng i bawl ve zel ang u.

 2. KHAWTLANGA PASTOR NUPUITE TIHTUR (MAWHPHURHNA): Khawtlanga kan mawhphurna te tlem kan sawi leh ang a, Thenawm khawvengah leh vengchhungah midangte tana entawntlak leh malsawmna thlentu nih kan tum zel a pawimawh. Pawn lama kan awm dan tur leh landan tur, kan incheina leh tihtur pawimawh Kawng 7 kan sawi dawn a ni:

(a) Faina leh Thianghlimna: Faina leh thianghlimna hi a pawimawh hle. Tawp takin kan awm tur a ni lo. Thianghlimna ngainat tur a ni. Ei leh in siam kawngah te, In leh a vel te, bungbel leh mutpuan te, inchhungkhur thil engkim mai chu theih tawpa fai leh thianghlimin enkawl tur a ni. Pastor nupui chu a hmeltha emaw hmel tha lo emaw a taksa, a rilru, leh a thlarau a faiin, a thianghlim a tul a, chutianga awm tur chuan a inbuatsaih zel tur a ni. Midang tan pawh entawntlak ni turin a faiin a che thianghlim tur a ni. “A kotu che u a thianghlim angin nangni pawh in chetzia zawng zawngah lo thianghlim zawk rawh u. Nangni in thianghlim tur a ni, kei ka thianghlim si a” (1Pet. 15-16).

 (b) Hawihhawmna : Pastor nupuite nun atana thil pawimawh leh nungchang duhawm tak chu hawihhawmna hi a ni. In chhungkhurah te, Biak Inah te, Khawlaiah te hlim hmel pu tak leh inhawng takin mi biangbiak a, chibai ngah tur a ni. Mite tan nelawm leh zaidam tak, induh ching lo, mi zahawm a ni tur ani a. Mite ngaihsak peih a, mite thusawi ngaihthlaksak thin mi, hmangaihna leh khawngaihna ngah mi nih tur a ni.             Pawl bik leh thian kawm bik neih loh hram hram tur a ni a, tutepawh kawm a, biak that vek tur a ni a. Mi huat bik te, ngei bik te neih loh hram tum tur a ni a, mi tha leh tha lo te, mi fel leh fel lo te pawh rem vek tur a ni. Tin, Mikhual leh inleng te hlim taka biak a, lawm thiam tur a ni a, an chungah that chhuah viau tur a ni.

(c) Incheina : Kan thuamhnaw hrim hrim hi a fai phawt tur a ni. Thuamhnaw inbela Inchei hi mihring min timawitu a ni a, min tihzahawmtu a ni bawk, chutih rualin, miten min sawiselna ber pawh a ni thei bawk. Chuvangin, inchei danah fimkhur a, a mawi tawk hriat a pawimawh hle. Chhe deuh leh tawp hmel deuh ang chi te hi inbel loh hram hram a tha a, man to lutuk leh incheina chhuak thar a pianga inchei leh leh uchuak tak inbel ve zel pawh hi a mawi lo a ni.

Incheina chu kan taksa nen inmawi tawk, a lan dana fai leh inrem tak te hi thlang thiam ila, a zahawm ber. Kohhran hnatlang turin emaw, bazar turin emaw, inkhawmna thuamhnaw inbel ta ila, a fuh lovang. Chutiang bawkin, ina kan awmna thuamhnaw nen inkhawm ta ila, chu pawh a dik chuang lo. Chuvangin, a hun leh a hmun a zira inchei dan hi hriat a tul em em a ni.

Tin, tunlai mite inchei dan ang apianga inchei ve zel lovin,  Pastor nupui te chu a bik takin kan incheina chu Pastor nupui tana incheina awm tawk leh mawi tawk, zahawm leh fai, thianghlim kan inbel thin a mawi hle a ni. Tin, pasalte duhdan leh mawi tih zawnga inchei thin a tha hle bawk. “Chutiang bawkin hmeichheho pawh inthlahdah lo leh inbel lutuk lovin, thuam inchawih tawkin inchei sela, ‘hmeichhia, Pathian ngaihsak intite chu inphu tawkin’ thil tihthatin inchei sela ka duh” (1Tim. 2:9-10).

(d) Thil phalna: Hnam hrang hrang te hian tihdanphung hran kan nei theuh va. Tunhma chuan Mizo leh Mara te hi thil neih inban tawm hnam kan ni. Thenawmte nen kan thil neih te hi kan inban tawm vek mai thin. Hei hi tunlaiah chuan kan ching lutuk tawh lo nain, kan la ching deuh tho a ni. Hei hi kan nunphung pakhat a nih ve tlat avangin mi thil phal tak nih ve a ngai a ni. Kan thil neih- hun leh tha, ei tur te, thuamhnaw, etc. te mi va pek ve emaw, hawntir ve emaw kan ui tur a ni lo.

Tin, tanpui ngai – damlo leh fahrah te, kutdawh te, rethei zawk te thil pek chungchangah te, mitthi ral, chhiatni thatnia thil pek ngaihnaah te phei chuan midangte tan entawntlak nih kan tum tur a ni. Tin, khawtlang thila sum thawh ngai, khawntesep leh Bill pek ngai chi reng reng pawh ui lovin, phal takin kan pe thin tur a ni.

Pastor te hi mite duhsak kan dawng tlangpui a, thilpek chi hrang hrang kan dawng fo thin a, chuvangin ‘dawngtu’ ringawt ni lova, pe chhuaktu nih ve tum tur a ni. “Sem darh chu pun leh zualna a ni a, Mamawh tawka liam kawmpui chu tlakranna a ni. Mi thilphal nunna chu tihthauvin a awm a, Tui leih thuntu chuan mahni pawh a inleih a ni” (Thuf. 11:24-25).

(e) Damlo kan, chhiat ni that ni: Bial chhungah emaw, veng chhungah emaw, hmun dangah pawh ni se, Damlo an awm tih kan hriat phawt chuan kan ngei ngei tur a ni, thil pek tur kan nei emaw nei lo emaw lam ngaihtuah lovin, damlo kan hrim hrim kha kan tih tur a ni a, kan tawngtaisak tur a ni tih hriat reng a pawimawh.

Chutiang bawkin chhiat ni that niah te chhuah zel hi kan tih tur a ni a, mi lungngaihna tawrhpui leh hnem te, mi lawmna lawmpui te hi kan tihtur liau liau a ni tih kan hriat reng a pawimawh.

Tin, Tar leh Upa te, rethei zawk te hnenah, a bik takin Kristmas lai te hian thilpek nachang  hriat hi a hlu hle a ni.

Tin, mite a tam thei ang ber hriat kan tum te pawh hi a tha hle a ni, hriat mang loh neih teuh ai chuan.

(f) Tawngkam tha : Pi leh puten “Tawngkam thain sial a man” an lo tih angin tawngkam tha na na chuan mi pawi a sawilo nge nge a ni. Harsat leh buai lai te, chhangchhiat laite hian thenkhatte chu thin a chhia a, tawngkam te hi a vin thei thin hle a ni. Mahniin kan inhre thin lova, duhtawkin kan tawng a, kan ang bawrh bawrh a, nuam kan ti phian a. Min ngaithlatu te leh bula awm ve te tan a hrehawmin a ninawm thin hle a ni tih pawh kan ngaihtuah thin lo. Chuvangin mi thinchhe tak leh ang peih tak te, tawngkam vin tak te bula awm chu miin an peih lo fo thin a ni.

Mi thinchhia leh ang peih tak nih pawhin insumna leh inthununna kan neih a pawimawh a, englai pawhin tawngkam tha, leh nem hman kan tum reng a pawimawh a ni. Chhungte leh midang ten kan bula awm nuam an tih theihna turin leh ngaihnat kan hlawh theih nan fimkhur taka awm a, tawngkam tha kan hman reng a pawimawh em em a ni. “Chhanna nemin thinur a tikiang thin a, Tawng huatthlala erawh chuan thinur a chawk tho thin…Mi a ka chuan thu atthlak  a chhakchhuak thin” (Thuf. 15: 1-2).

(g) Sum hmanna: Sum hman dan hi thiam a har hle a ni ang, tute pawh hian engzat pawh la lut ila, kan indaih thei tak tak lo a ni. Chuvangin Pastor nupuite hian sum kan lakluh milin, thla tin Budget fel tak kan siam thin ngei ngei tur a ni. Hei hi sum lakluh tlem leh khawsak harsa deuhah phei chuan a tangkaiin a pawimawh tak zet a ni.

Entir nan- Rokhawlna dang, damlohna serious leh thil thleng thut te a awm lo a nih chuan Thla khatah Rs 20,000/- ka la ta a, Rs 20,000 atangin a hmanna tur pawimawh zawng zawng ka ziak chhuak vek ta a, leiba nei lo turin chhungkaw mamawh leh tulah chauh pawisa hmang turin budget chu fel takin ka siam ta a ni.

Ka budget siam ang chiahin Pawisa chu ka hmang ta a, mamawh nilo, duhzawng chi hrang hrang ka lei thin te kha ka lei ta lo va, tichuan leiba nei lovin kan awm thei hram  a ni.

Bazarah kan kal chuan mamawh ni lem lo, duh chawp tur thil kan hmu tam em em a, kan duh a, kan lei zel a, secondhand te hi mamawh loh pawhin kan thing addict tlat. Tin, miin thil lo zuar se, mamawh loh pawh a bain kan la a, installment kan in pe a, heng avang hian leiba, kan neih phah a, ei leh in lamah harsatna kan tawh phah a, thildang mamawh tam nen, tichuan harsa takin kan lo khawsa thin a lo ni. Chuvangin  loh theih loh thil te a nih loh chuan,  a bain thil engmah la lo ila, ba neih sa  chu bat belh lo bawk ila, kan leiba neihsa chu a hun takah, dik tak leh rinawm takin rulh ngei ngei tur a ni. Chutilo chuan, miin min ring thei lo vang, kan pasalte leh keimahni rawngbawlna chu kan thaichhe zel mai hlauhawm tak a ni. “Sum tam tak aiin hming that hi thlan zawk tur a ni a, tangka leh rangkachak aiin duhsakna a ngaihnatawm” (Thuf. 22:1).

CONCLUSION :  Kohhranah leh Khawtlangah Pastor nupui te dinhmun hi a tha viau lem lova, a chhe viau hran lo bawk. Mi thenkhat erawh chuan Pastor nupui dinhmun leh nihna hi an ngai hniam hran lo a ni. Pasalte Kohhran hruaitu ber Pastor an nih avangin Politician nupuite nen pawh khaikhin leh tehkhin an hlawh thin hle a ni.

Mite thil thlir dan a inang hlawm lo va, a tha zawng leh a fakawm zawnga thlir thin mi an awm laiin, a sawisel zawnga leh a faklo zawnga thil thlir reng mi an awm reng a ni tih hriat reng a tha. Chungho ngaihdan leh thlir dan te chu engtiklai mahin kan khapbehsak thei dawn lova, keini tan lah insawifiah leh thiamthu sawi reng pawh thil theih a ni bawk hek lo.

Engangin nge mite hian min hmu se, min sawi se tih kan duh? Mite hian min hmu tha se, fel min ti se tih chu kan duh vekin ka ring a ni. Chuvangin kan chezia leh kan tawngkam chhuak tinrengah kan fimkhur hle a ngai a, kan nihna hi hrechiang ila, Kohhran leh Khawtlanga kan mawhphurhna, kan tihtur te thahnemngai tak leh taima takin ti zel ila, Pastor nupui tih atan a mawi tak tak  kan sawi tak te leh kan sawi lem loh thil tam takah taima tak leh rinawm takin thawk zel ila, kan mawhphurhna, kan rawngbawlna hi hlen ang u. Tichuan kan hlim ang a,  pasalte pawh an hlim ang a, chhungkua leh kohhran, khawtlang a lo hlim ang a, inthlahrung hauh lovin, lawm tak leh lungawi takin Lalpa rawng kan bawl thei dawn a ni. “Engpawh ni sela, in awmdan chu Krista Chanchin Tha nen inmawi phawt rawh se” (Phil. 1:27).

(He article hi ECM Pastor Nupuite tana Seminar buatsaih Paper Present a ni a, Dt. 25th November 2014 khan Bethesda Local Church-ah neih a ni. By Admin)

One thought on “The Role of Pastors’ Wives in Church and Society

  1. Pingback: Pastor Lahpinôzy châta Seminar hnei | ECMonline.org

Leave a Reply

Your email address will not be published. Required fields are marked *