Rev. P. Riabi tawhta Krismas nata Kôthiehpa Bietapa

Abeipa Seichanô ei châ hih, na reipa hawhta ei chô liata tlô mawh sy.” Lk. 1:38.

Rev. P. Riabi

Rev. P. Riabi

By Rev. P. Riabi, 

Senior Executive Secretary

ECM Headquarters, Siaha

 Valyuhchâpa Gabriela ta Mari hnohta “Saw phaoh aw chi ta, sawchapawpa na sa aw; a moh ta Zisu na bi aw,” Lk.1:31 tahpa ta a reih. Mari ta, “Na reipa hawhta ei chô liata tlô mawh sy,” a tah thei thlâh hapa he no-âh â chhih kaw.

Mari he Zawsi ta a lahpinô châta âpahawhpa a châ. Zawsi he Zu chi pathla châ ta, Zu Phôhryhpa apyhna liata ngâchhih kawpa a châ hra. Zu nawh lahpinô âpahawhna daihti he kô kha châ ta, he daihti liata chapaw ta vadua kawpa tat hi sala, âpahawhpa chanô kha, “Nôhmei laihsa” a châ aw. Chapaw hropa liata âpiepasipa ta nata vahpa ahneipa ta a châ khiata cha ‘Apheipa’ hawhta pachâpa châ aw ta, alô ta vawsaopa a châ aw. Chavâta, chapaw hropa khopa hnei tlyma, chapaw hropa lâ dyhchâ awpa tlyma pasaipa châ khao vei.

Cha hawhna hra chata, chapaw ta lahpinô âpahawh khiahta cha, chanô hropa khopa tlyma, lahpinô tlyma a hnei khiata cha ‘Apheipa’ hawhta pachâpa châ ta, alô ta vawsao pyly hra awpa a châ. Chavâta, Zawsi nata Mari he ahnei mâh hra vei ei sala, Nôvah hawhta pachâpa châ ei ta, ngâchhih kawpa ta ama y awpa abyuh.

He hawhpa duasu liata ama duah thlâh ha nota Vâlyuhchâpa Gabriel ta Mari hnohta “Saw phaoh aw chi ta…” a tah thlâh hapa he Mari châta pahnothai a ru kaw aw! A saw phaoh awpa deikua cha Thlahpa Pathaihpa saw châ aw ta, a moh ta Zisu bi awpa a châ. Mari he keimo palôh hawhpa a phaohpa châ sala, “Hmo theipa châ vei, khoh tiarâh va na,” a tah thlâh ha awpa a châ. Châhrasala, “AMEN” a tah thei thlâh hapa he Khazohpa Thlahpa a hnohta y ta, Abeipa châta tlokhuh ta â hlâ khai tahna a châ. Mari maty ngâhpa ta â piepasaina vâta Khizaw Pachhatuhpa Zisu Krista he Mari py chhôh tawhta a vaw pih haw. Zisu Krista he eima Beipa nata Pachhatuhpa a châna he my khah ei suh u. Zisu Krista châta eima palôh âpahy awpa ta a reihtuhpa zydua ei cha hrua ei.

Ei ngiapâlâhpa khongaitapa saih u, Mari hawhta eima chô liata hmo a tlôpa zydua he “AMEN, Abeipa na bie hawhta ei chô liata tlô lyma se,” tah awpa ta âmâ chyu ei suh vy.

Na bie hawhta ei chô liata tlô lyma se eima tah nawpa daihti reih tua ei si:

  1. Pasana nata thina eima tyhna daihti liata.
  2. Rairuna nata vaduana eima tyhna daihti liata
  3. Eima hmochhuahpa liata eima hlaotloh leina daihti liata
  4. Eima hia leipa byhna eima daona daihti liata.
  5. Awnanopa liata tovyuh eima kho kawpa eima hnei leina daihti liata.
  6. Sawkha rai vâta tlyma, Awnanopa liata eima chakaona kyh vâta eima kho leina su liata eima yna daihti liata.
  7. Eima dona liata chhao reipachhiena eima tyhna daihti liata.

Na bie lyma hawhta ei chô liata tlô se, a tah theituhpazy hnohta Khazohpa ta hmâh tyh ta, byhna a thata ama dao.

Abeipa ta Byhna pie se, Amen.

Leave a Reply

Your email address will not be published. Required fields are marked *