Pastor Lahpinô Maohphaona – Chhôhkha liata by B. Zihlua

B. Zihlua

B. Zihlua, Coordinator, Mission Department, ECM Assembly Office, Siaha

Bie hmiapa:

Eima Bible liana heta Pastor lapinôzy maohphaona tahpa ta a eih hrâh ta rona hmô leipa pi ta, châhrasala, chakaotuhpazy nata Beipa chituhpa chanôzy maohphaona nano nanopa deikua Bible liata maniah a chho. A thao no tawhta Khazohpa ryhraona zie hawhta nô duasu he a vahpa nata a khopa ta taopa a châ. Eima râh Awnanopa liana heta Pastor lapinô tlâ châ ngâlâh â daih leipa ta,  Khazohpa raona zie lymâ hawhta vahpa a chakao thaipa, deichhy thaipa, kao toti liata a sohsi theipa, ngâtlâh a châpa nata mopa tlâh a châpa, O chhôh zachhihna a pabohsatuhpa nata sawzy châta lâpi dopa a chhopahmô theituhpa a châ awpa a peimawh ngaita kaw.

Pastor lapinô rai nata maohphaona he mohropa nô nata pakho thai khaipa châ leipa ta, Khazohpa china nata thapatlôsana chhaota a maohphaona he a chaba ngâh awpa a châ. A hmiakô liata tao awpa zy cha aly kawpa nata riahpha kawpa ta Khazohpa ta a piezie lymâ hawhta hriapa nata taopa heta Pastor lapinôzy sôna nata zachhihna thata a palâsa. A palôrupa tha a chhâ awpa châ leipa ta, Khazohpa liata thatlôna hiapa ta chhôhkha maohphaona he a hria hualua awpa tlao a châ.

Nôzy maohphaona liata pachâ ngâ thlâh awpa cha kheihhawpa O chhôh tawhta a vaw puapa ma a châ tahpa hlâta kheihawpa chhôhkha ma a padua aw tahpa he a châ. F.M Knowles ta, “Chhôhkha phapa paduapa châ Vârâh apadih chhielie” tahpa ta a reih. Chanota, Doughlas Mc Arthur deikua cha, “Chhôhkha padua pasuh leipa tluta chhiena rarôh ypa nata riethei a chhipa y vei” a tah. Cha y zie cha apadua tuhpa liata â pahnie kaw. Pastor chhôhkha Dictionary cha Pastor Lapinô he a châ eima ta thei aw.

  1. Nô hro liata hmiapasa tua awpa peimawhpazy:

Chhôhkha mohhôhna kyh liata nôzy ta ama maohphaona pahno thai ta, tao tua awpa peimawh viapa hmia pasa thaina he nô zy O chhôh ryureihna liata a peimawh kaw. He he ta nôvah likawh, sawna likawh liata nata chhôhkha liata âpahnothai leina, buana nata rairuna nano nanopa a tlô thei awpa tawhta a khôkhâh theina lâpi a châ.

(a) Khazohpa: Pastor lapinôzy he ama vahpa nata sapa liata pôhkha ama châpa dei châ leipa ta thlahpa râh liata pôhkha ama châpa chhao he khâ ama thei ngâ thlâh ha awpa a châ. Nohchareih Khazohpa pahnona liata hroh ta, laiseih lymâ awpa nata Ano kyhpachâ chai awpa ta Beipa ta miah a hnaw.“Abeipa na Khazohpa cha na palôh tlokhuh ta, na hrona tlokhuh ta, na thlahpa tokhuhta kyh pachâ teh. He he biepiepa rôhna chaipa nata peimawh chaipa a châ.” (Mathai 22: 37, 38)

He biepiepa rôhnapa nata peimawh ngaita kawpa he nôhrâhpa ta a nohto hro liata papeipamawhsa ta, Khazohpa kyhpachâ ta, Ano liata tlokhu a pie khaina heta vahpa, sawzy nata mohropazy kyhpachâ theina a pahneisa tyh. Joyce Meyer ta, “Khazohpa ta kyh miah apachâna eima pahno pasia hlâ viata la, sasyh chhao kyhapachâ thei leipa pi ta, sasyh hmata kyh eima pachâ theivei khiahtacha, mohropa kyhpachâ awpa aru ngaita kaw.”a tah.

 Nôhrâhpa ta Khazohpa nata apazaona phapa nata a i pa khâchâ hnei na chôta O chhôh liata a maohphaona nano nanopazy aly kawna chôta a hriapa heta a raihria liata “A sawzy ta aly thai kaw tyh ei ta, a vahpa chhaota ano cha reithai ta a papyupahly tyh.” (Biesozy 31: 28). He he ta chhôhkha liata alyna nata thaphana tao papua ta, Khazohpa rôhnahna nata phana ama chhôhkha tawhta a palâsa.

(b) Vahpa: Eima râh liata Nô thokhazy cha ama hro liata vahpa hlâta saw nata hmohropazy liata palô ama pachhôh via khia maw tah theipa a châ. He hawhpa chhôhkha liana heta adyhryhna nata alyna hnabeiseih theipa châ vei. Sawzy nata hmo hropazy he pachâh peimawh lei awpa tahna châ leipa ta, anodeikuala vahpa cha chhôhkha luh chaipa a châna hawhta uasa ta papei-pamawh sa tua chai awpa he hmohropa zydua hlâta ângiahpa a châ. Vahpa nata palô ahmôthaina nata azaona phapa (good relationship) a y khiatala O chhôh ziza pha aw ta, ngiaryh â chhi aw ta, hmohropa zydua chhao y zie hneipa ta a sie khei thei hra aw. Abeipa bie chhaota vahpa liata ângiarih awpa ta miah apasyu (Ephesi 5:22).

(c) Sawzy: A sathôna liata sawzy ama châ. Nô-paw zy he sawzy mohôh ta chhihtha awpa ta Beipa ta angâhpazy nata A raih hrialâh awpa ta raopazy ama châ. He maophaona zydua vâta sawzy he sôh pachai ei ta, ngâchhih kawpa nata a sohsi kawna chôta Beipa asaohiana chôta ta chhihtha ta, chyhsa pitlohpa ta padua awpa he Beipa ta nôpaw chô liata a hnawpa a châ. Chhôkha liata ama peimawhzie kyhtotie liata pahnosa awpa he a peimawh kaw. Sawzy he Khazohpa tawhta ryuto sô ngaitapa ama châpa hawhta nô nata paw âlyna pakisatuhpa nata kyhpachana pa-isatuhpazy ama châpa vâta uasa kaw awpa abyuh ngaitapa a châ.

2. Pastor lapinôzy maohphaona vahpa liata:

Pastor zy he Khazohpa ta a chakaona rai hria awpa ta sathaw a thupazy châ ei ta, chanota sapa ta a duapa ama châpa vâta tloh leina nata sia leina ahnei theipa, khatino rai ta bao angiahpa nata deichhy a ngiahpazy ama châ hra. Cha ama chakaona liata bao ta, tha patlo awpa ta lapinôzy chô liata khazohpa ta maohphaona a piepa lymâ hawhta a vahpa cha aluhpa/chhituhpa a châ tahpa pahnona chôta nata Beipa ao nathliena chôta avahpa baotuhpa kyh toti liata a châ awpa a châ (Âthaona 2:18).

(b) Vahpa palysana kyh liata: Vahpazy amâ lyna chaipa châ nama kha châ chi ta, sawzy he alyna pakisatuhpazy tlao ama châ. Vahpazy heta lapinô tawhta hmolaipa pi a hnaw leipa ei ta, a hnabeiseih hra vei ei. Hmo chynawh kawpa liana heta amâ lyna tlao a châhri. Chavâta, nôhrâhpa cha â phana rakhata a vahpa aly n’awpa nata palôtlah n’awpa ta a theinazy a papua awpa a châ. Vahpa a palysapa heta ano alyna chhao âbaichhi via cheingei hra nata hnabeiseih â chhi. Sasyh alyna dei pachâ leipa ta mohropa alyna tluapa he Krista palôrupa a châ (Romans 15: 2, 3).

i) Hmo a khopa nata kholei pahno a chhuah teh. Chapaw palôrupa pahno thai a ru kaw thei aw. Châhrasala, ama khozie nata kho dâh a châ leipa pahno thaita, cha ama khozie nata kho dâh hawhta a daihtita liata hmotao ta, y thaipa he lapinô ta a chhuah lyhlia awpa a châ. Lao nata ahmie chhoh dâh a khopa pahno ta, cha hawhta chho thaina zy, amo ta pha nata angia ama tahpa hawhta atobi thaina zy, kyhtotie liata nôhrâhpa ta a vahpa khona palôh pahnokhei kawna chôta hmotaopa zy he ama lyna a châ.

ii) A chysia a pathaih kawpa ta sohpa tyh mah y: Pastor zy he program appointment tao chiehpa dei châ leipa ta, emergency ta khatinorai ta program nata counseling a hnei theipa ama châpa vâta, ama chysiazy cha khatinorai ta a pathaihpa ta nata pamih chiehpa, pheiky, Biehrai, Hlabu, note bu nata chakaona liata a peimawh hropazy abyuhna daihti lia maih ta daity leipa ta atobi nata hmâ thei awpa ta so ngâ thlâh ha awpa châ ta, zawpi hry ta a pahlaopa ama châpa vâta ama roh a pahâh kawpa ta papuasa tyh awpa a châ. Cha chata ama hro palysa aw ta, ama chakaona cha apha kawpa ta ama tao thei aw.

iii)  O Chhôh liata: Pastor zy cha su peimawhpa nata chyhsa o nano nanopa dyhchhie nata dyhpha o liata chakaona hnei ta, daihti a hmâ hluh awpa ta hnabeiseihpazy ama châ. Chavâta, ama o chhôh cha apahana su pha chaipa nata chakaona a hnei heih nawpa châta a pachhuahpanohna, thlahpa lâta thatlôna âlâna su a châpa vâta, ochhôh ziza cha a hua thei chaina hawhta tao awpa a châ. Pawhrâhpa ta ochhôh cha angia aryhna nata a tlaichhai chaina su a châ thei nawpa ta nôhrâhpa ta apha thei chaina hawhta a mohôh awpa a châ.

iv) Rakhô liata: Khazohpa ta nôvah cha a peimawh rairie awpa ta a taopa hawhta, vahpa cha rakhô liata palysa awpa a châ. Nôvah duasu ahmâ theilei na taihta sapa chiehleina ahneipa a châkhiah, dawhty thlai âpamosa ta, nôvah aly kawpa ta daihti â hmâ awpa a peimawh ngaita. Rakhô liata vahpa apalysa thei leipazy heta ama vahpa chakaona lia taihta thathyu leina nata palôrupa liata aly thei leina a patlôsa theituhpa a châpa vâta a pha kawpa ta a mohhôh ta, a pathai pahâ tyh awpa a châ.

(b) Rairuna duasu liata a pahno thaina: Chyhsa ahy chhao raita rairu na he eima hneipa a châ. Rairuna he a hyhmâh ta khôkhâh thei leipa pi ta, anodeikuala rairuna ta chyhsapa â pahnieh awpa châ vei. Beipa thatlôna a ngâchhâna chôta rairuna he chatôh khoh awpa tlao a châ (Phil 4:13). Nôvah cha sapa liata pôhkha ama châpa dei châleipa ta, palôrupa nata thlahpa râh liata pôhkha ama châ awpa ta â hnabeiseihpa ama châpa hawhta ama likawh liata apahnothaina lai ngaitapa a y awpa a châ.

(c) Chakaona kyh liata: Pastor vahpa a hneipa cha Khazohpa awna a chhypâ tahpa a pahno pasia tua awpa a châ. Pastor lapinô cha avahpa chakaona bia liata Abeinô a châpa hawhta mohropazy mopahtlâh a châ awpa châ ta, chyhsa vâtlâh chô liata a ypa a châna hawhta bie chhohchhâ kyh liatazy, hrozie nôchâh kyh liatazy, phana papuana kyh liatazy, tiamana kyh liatazy, apakhy nata Awnanopa hmotaona kyh liatazy, khichhai nata o charei kyh liatazy, kyh totie liata mopâtlâh a châ ngaita awpa a châ. He zydua he vahpa chakaona liata thapatlôna chhaichhi peimawh ngaita kawpa a châ. Avahpa hawh tlaita bia kyhpachana nata thapasana a noh liata a hnei hra awpa a châ.

Pastor Lapinô vahpa chakaona pahnokhei thai rai rai leipa y tyh ei ta apei ngaita kaw. Awnanopa hmasie n’awpa ta a chakaona liata pahâh khei thai kaw awpa byuh ta, tha apathyu rairina chhao he hmo peimawhpa a châhra. “Chanô ta avahpa hnota ahmo piepa hryh liata rônah chaipa cha kyhpachana chôta mohôh ta, hmasie via lymâ awpa ta pasyuna phapa pie nata thahpathyuna he a châ.”– Leo R.Kinsell.

  1. Sawzy liata maophaohna:

Nôzy chakaona rai peimawh chaipa cha sawzy mohhôhna he a châ. Pastor  lapinô cha a sawzy mohropa mopâhtlâh châ theina taihta a mohôh papua awpa a châ. Bible lia ta sawzy ama hawti ta tawhta pachuna dopa liata chhitha a peimawh zie a reih. “Na hawtizy cha pachu thei awpa hawtipa ama cha no tawhta chhorei teh. Na chhorei leipa khiahtala, amosasyh ta ama parao awpa ta na baopa a cha aw.” (Biesozy 19: 18). Nôhrâhpa cha kyh totie liata a saw cha pahnopasia ta, kyhpachâna chôta nohchareih Beipa khozie ta a chhihtha tyh awpa a châ. Sawzy chô liata nô maohphaona hluhpi hry liata a tlâhpipazy-

(a) Beipa pahnona kyh liata: Lei liata ryu na hneipa hry ta saw zy ngâhlâh he Vârâh taihta na tlôkhei awpa a châ tahpa pahnopa ta Khazohpa kô a tlôh thei nawpa ta na theina zydua papuapa ta na sawzy na mohhôh awpa he Beipa ta a châ hnawna a châ. Sawzy ta Khazohpa cha ano ataotuhpa nata ano Beipa nata Pachhatuhpa achâ tahpa a hro liata pahnona a hnei thei nawpa nata Ano kyhpachâtuhpa, Baotuh â hniapa nata thlah a palôhtuhpa a châna zie zy khatinorai ta pachu awpa nata chhihtha awpa a peimawh ngaita (Ryhpachaneina 6: 7). Charles H. Spurgeon ta, “Na saw zy Khazohpa lâpi na pachu lei khiatala Sâtâ ta moleina lâpi apachu pyly aw” tahpa ta a reih. Khazohpa ta sawzy he chhâzaw hrona ama hnei awpa khoh ta, cha kyh liata chhoreina awpa ta chhomasi chhao hmâ awpa miah a pasaipa a châ.(Biesozy 23:13-14)

(b) Châ achuna liata: Sawzy sapa nata Thlahpa liata hmasie ta, saw hmâtlâh papua awpa heta a hawti no tawhta achuna liata hmah pasiesa awpa nata achuna peimawh zie chho awpa he nô maohphaona hry liata a châ. Hneina ta a pha rakha liata yzi hnei kawpa ta sawzy achuna liata chhihthapa he sawzy hlaotlohna lâpi pha ngaitapa a châ. Sawzy achuna kyh liata nôzy ta tao awpa nata hria awpa hluhpi y ta, reikhai thaipa châveihrasala, hezy he pachâpazi via tua suh u.

i) Achu nawpa daihti (Time table) na taopa tyhma? Athai eihhrâhpazy ta ama reina liata cha a hawtino tawhta yzi hnei kawpa ta achu nawpa daihti pie tyhpa heta hawtipa cha ano sasyh hmialâ tô (improve) lymâ ta, daihti sôhna nata hmâdâh pahno ta, cha chata â chhuahna apatlôsa tyh ama tah. Chavâta, châ achuna daihti eihhrâhpa tao awpa he nôzy maohphaona a châ. A pakhona ta my 5:00 – 7:00 za 6:00 – 9:00 zy he atlâhpipa hawhta pachâ sih la. Achuhaipazy achuna lâthlôh (stage) yzie ta tao dâh a nano thei aw. Eima reih khoh chaipa cha, ama chuna daihti sianô kawpa taopa awpa he a châ. Cha dei châ vei, he achuna daihti taopa liana heta aviachaipa ta nô zyta ama kiahpâh ta liata a tyupâ lymâ awpa nata athei khia ama nie-baw awpa chhao alikaw ta liata pie tyhpa he apeimawh kawpa a châ.

ii) Saw zy tao awpa (homework) na hiahri/mohkhei beih mâ? Hawti rei a ngiah kawpa nata tao awpa a pachâ peimaw kawpa a ma y nota thokha Pachutuhpazy bie pachâ peimaw rai leita tao awpa a uasa kholeipa ama y. Chavâta, tao byuhpa cha thlai pataosa ta hrôbie pazie awpa he nô zy maohphaona peimawh ngaitapa a châ.

Sawzy ama chuna kyh liata ama duasuh pahno awpa ta eikha chhâ ama pachutuhpa nata reih khona na hnei bei rai ma? He chhâchabi he apeimawh ngaita. Sawzy school liata ama hrozi nata achuna liata ama hmasiena dâh pahnopasia awpa he nôzy maohphaona nata tao hialia awpa hry liatapa a châ. Achhâpa cha achuna kyh liana heta nô-paw avaona daihti hlâta pachutuhpazy chhihthana ry liata ama yna daihti he a hlu via syulyu vâta a châ. Chavâta sawzy achuna he kao toti tawhta a chu ta, chhihtha awpa he a peimaw ngaita kawpa a châ.

Sawzy ama pahâh viana nata saduthliena (aim/goal) liata pachusa thai awpa he a peimawh ngaita. Eima râh liata thokha saw zy a chuna liata ama raona chhâpa he ama pahnieleina nata pahâhleina liata nô-paw zy khopa vâta pachu vâta a châ thei aw. Chavâta, ama pahâna, pahniena nata sôh-piah chhaota a phana rakha liata tiama kawpa ta pasyu ta, pachusapa heta sawzy hlaotlohna lâpi pachhihsatuhpa a châ cheingeih aw.

iii) Hrisena kyh liata- Saw thokha hluhpi cha hrisena ta apahnie lei vâta châ ama chu awpa   hawhta achu theileipa ei ta, ama châna awpa hawhta a châ pha theileipa ama hluh ngaita. He vâna heta nôzy ta ama sawna hnatlâna pachâ peimawh kaw awpa a byuh. Hrisena apha khiahtacha palôh a ly ta, pachâna la thlie chhao a pha tyh. Sawzy apha kawpa ta châ ama chu thei n’awpa ta nôzy ta adaihti liata sawzy medical check-up pahneisa ta, ama theina rakhata ama hnatlâna pachâ peimawh awpa a châ.

(c) Phusa hmâna kyh: Sô he chyhsapa nohto hro liata peimawh ngaitapa châta, a hmâ thaipa châta hlaotlohna tlôkhei ta, ahmâ thaileipa châta cha chhiena a tlôkhei theipa a châ. Chavâta, nôzy ta sawzy hnohta sô hmâna yzi dopa nata sôh kyh liata ngâchhih kaw awpa ta ama pachu awpa a peimawh ngaita. Saw uthei viapazy hnohta chhochhi cha ama hlaozie nata nohto phusâ hmâna (expenditure) zy pahnosa ta, chhôhkha phusa hmôna a supa ta phusa hmâthai a peimawhzie chho chanei ngâ thlâh ha awpa a châ. A châhta cha nohto niebaw patopatiana liata maohphaona pie tyh awpa a pha. He he ta phusa hmôna rairu zi nata a hmâ naozi pahno papuasa aw ta, chhôhkha khisa apatohpatiana liata maohphaona ahneizie pahnosa aw ta, maohphaohna piepa heta pitlohna hro lâ a chhihtha hra aw.

(d) Viasa apakyhna liata: Nô thokhazy cha sawnawhzy he kheihhawhpa chyhsa ma âpakyh tyh tahpa rai pachâ lei ta pathlie pathlaw thlâh hapa eima râh liata ama hluh ngaita. Sawzy he o chhôh ama ngia â ryh lei khiatala nôpaw zy a mohpasia awpa chhao a peimawh ngaitapa a châ.Viasa apakyhpa tawhna heta saw cha kheihhawhpa chyhsa ma a châ tahpa a pahno thei aw. Irag nah bieso ta cha, “Na viasapa zy na chho la, ahy ma na cha tahpa ei cha chho aw” atah. Chavâta, nôzy, he kyh liata sawzy khâsia thai kawpa byuh ta, viasa apakyh dâh nata a pakyh lai awpa chhao chho pahmô thai awpa a peimawh kaw. Nôzy thlalâ cha sawzy khôtho lâ ama y dâh liata a châ. Mohropazy ta, A hy nô eina tah ei maw? tahpa a hiahri ngâhthlâh awpa chhao abyuh ngaita.

(e) Atobina nata pathaihna liata: Atobina angiapa he a chyhsia mâ liata apahnie leipa ta a daihti nata su, eima khisana ta aphana rakha lymâ hawhta atobi thaina he tlao a châ. Pastor lapinô mohôhpa sawzy atobina cha moh thadâh â chhi awpa châ ta, a chysia a pathai awpa a châ hleikhô ta ano pôhpa chhao a pathai awpa a châ. Cha dei châ vei, sawzy a môziana chhao a pathai awpa byuh ta, ama chhaichhi sona chhao yzie hnei kawpa ta a y awpa a châ. He zydua he hro liata ama laiseih khei lymâ n’awpa ta nôzy ta sawzy apachu lymâ awpa he maophaona lai ngaitapa a châ.

(f) Y-dâh (hrozie) chhopahmôna ky liata: He kyh liata nôzy maohphaona a lai ngaita kaw. Ama hrozie-nôchâ he azyh zyh ta ta taopathi theipa châ ta, nohcharei ta pachu ngâ thlâh hapa abyuh. Beipa bie ta, “Hawtipa cha a sie nawpa lâpi pachu la, a machâ tita chhao siesai aw vei.”(Biesozy 22:6) a tah. Bietana rôhnah ngaitapa a châ eima tah nota tao awpa eima hnei tahna a châ. Ngâchhihna kyh zy, tiamana kyh zy, nônaina nata areisina kyh zy, daotheina kyh zy, hlâta uthei viapa zahna kyh zy nata kao nano nanopa chhaota pachu ngâ thlâh ha awpa a châ. Sawzy pachuna liata nô zy peimawh zie George Herbett ta châ vaw pahnopasia kaw ta, “Nô phapa cha pachutuh phapa 100 nata a khoh” tahpa ta a reih ngâpa a châ.

(g) Ku raihria kyh liata: Khizaw thaina sona nata technology a kaw sohsâh lymâpa heta kyh totie liata hmahsiena lâpi miah vaw pachhihsa ta, ku raihria ta, riethei tu leipa ta, niebaw a tluana lâpi chhao a vaw pahy lymâ. He vâna heta thyutlia hluhpi ta ku raihria he noza tahna nata thathina vâta hria awpa rai ta a pachâ leipa chhao ama y hôlô hra. He nona heta Pastor sawzy cha ama theina rakha ta nata ama phana rakha ta ku raihria he pachu awpa a châ. Chyhsa sohpa reizie liata cha, “Chyhsa ta a sawzy cha ku raihriah apachu lei khiatala paruna a pachu” ama vaw tah raipa a châ.

Lyuhchâpa Pawla ta thâtihpha  ama chhona liata Ku ta hria pasa ngaitapa ta hriapa ta nie a tlua pa ama châzie maniah achho.(1Kawrini 4:12). Cha dei châ vei, amo cha mohropazy rie ama pathei lei nawpa ta a chhô a zâ ta hriapasa ngaita ei ta, ahy pati hmâh ta a saipa ta nie beih leipa ama châ zie reih ta, cha ama taona chhâpa cha “maniah nama mopana châta tahpa ta tlao eima hria tyh” (1Thes. 2:9; 2 Thes. 3:8,-10) a tah. He he ta raihria peimawh zie maniah a chho pasia ngaita. Rai a hria hluhpa nata a patuapalua hohpa mai a tivy ei ta, chhôhkha chhao ama ly hrâ. Krizyhpa nata thathipa he â hmie vei.

(h) Nôvah tluana kyh liata : Nôvah tluana kyh eima tahpa he lapinô/vahpa hnei khi apha hapa hnohta pachuna a châ chai. Pastor sawzy taozie a châ leipa nata angialeipa- arâ ta arâpa tlyma, asianô lei kawpa ta lapinô/vahpa apahruanazy he nô nata paw maophyuhna lai ngaitapa, chakaona liata mo a pachaotuhpa a châhna zie zy, chhôhkha paduahna kyh liata a sohsi ngaitapa ta Beipa a saohiana chôta lapinô/vahpa zy tlua awpa a châna kyhzy pachu awpa he nôzy maohphaona a châ. Athei khiata cha chhie-na-pha ama pahnopa ta nata, Khazohpa khodâh hawhta nôvah pathaihpa ta ahneina peimawh zie nata, byhnâ tona a châ tahpa pachu ta, amo (sawnawh) zy nahkhaoh thei pâna ta nôpawzy ta Beipa liata pavaosa ta hiakhei awpa he a peimawh kawpa a châ. Chhôhkha Counseling hawhta siekheipa châsala kho a chhih kaw.

(i) Reihkah hmana liata: Reihkah hmana liana heta a hriadâh nano nanopa a y tahpa eima pahno chyu. Reihkah phapa ta chyhsa palysa ta, reihkah phaleipa ta chyhsa palôhpasa sa ta, a pachasa thei hra. Greek chyhsa sopa, Publius ta “Ei biereipa liata a ngiapachhi tyh na ta, ei chalih thlah ha no la a ngiapachhi beih va na.” atah. Bei Davi ta, “Ei hmotaopa maih ei sohsi bâ aw, ei paleih ta na pamoleisa khao leipa aw ta: Moleipazy ama vaw hnia nota khapa hmah reih khao aw va na.” (Hlazy 39:1)

He a chô liata eima reipa tawhna heta reihkah hmana nata biereih liata a sohsi peimawhzie apalâsa ngâsâ. Nôzy pakah tawhta bie a puapazy cha sawzy chata sona nata alyna a pietuhpa châ thei sala kho a chhi kaw.

Sawzy reihchhiepa ta chhoreipa hlâta reihkah phapa nata naipa ta chhoreipa he ama palôhru pahnie a nao via. “Bie phapa ta hrona tlokhei ta, bie chhiepa ta na palôhrupa a parao tyh.” (Bisozy 15: 4). Chavâta, nôzy ta reihkah ama hmâpa cha ama sohsi kaw awpa a châ.  “Palôh liata a biepa cha pakah ta a reih tyh” (Mathai 12: 34b) vâta.

(j) Ypâ pa liata nôhrâhpa maohphaona:Nô a sihphih viapa nata rai hriana ahneipazy ta ypâ peimawh chyu ei ta, cha ama ypâ pa cha chanô/chapaw ama châ thei aw. Kheihhawhpa ama châpa chhao ta sawzy chô liata maohphaona ama hneipa hawhta ama ypâ pa chô lia chhaota maohphaohna ama hnei tahpa nôhrâhpa ta khâ a thei ngâ thlâhha awpa a pha ngaita. Lapinô siapa ta “a seichanôzy cha ama tao awpazy (a) chho tyh” (Bisozy 31:15b) a tahpa hawhta, kyhpachana chôta kyh totie liata ypâ pazy a chhorei awpa nata amo chata nô hawhta ama tlaichhai thei hana taihta a mohhôh awpa ta hnabeiseihpa nô ama châ.

Pastor lapinô ta a sawzy thlahpa kyh a pachâpa hawhta ama ypâpa thlahpa leidia awpa chhao a vaih awpa a châ. Nô thokha ama ypâ pa a pakhy a uasa leipa a pei tah leipa ama ypa ta âlâ. Thokha heihta ama pakhy awpa hlâta pakhy ama bâh pataw nata thopi nata byuh hropazy patohpatia awpa vâta ama pakhy leipa pha tah viapazy ama y heih. He he Pastor lapinôzy châzie awpa châ leipa ta, ama khisa tôhtu pha nawpa nata thlahpa tlâh nawpa ta lâpi a pahmotuhpa nô ama châ awpa tlao a châhri.

4. Ochhô Hmobaoh mohhôhna (material management) liata:

Khizaw hmahsie via lymâ ta, nohchareih hmobaoh eima hmâpa nata peimawhpa chhao a pôh via rili. Eima mohhôh awpa chhao hluh via rili ta, maohphaona chhao a lai via lymâ. O nata a chhôh liata a ypa chhaichhizy cha a chhie tlyma apha tlyma, aparoh tlyma a thieh tlyma a pathaih ngâsâpa ta mohhôh awpa châ ta, a y nawpa dopa ta liata yzie hnei kawpa ta chhaichhizy sohpa nata paryhpa he mo â ngia hleikhô ta, ngiaryh a chhi ta, a pha kaw. O chho hmobao so dâh nata paryh dâh yzie liana heta nôzy châna a chhopasia kaw. China bieso ta cha, “O na puasai nah he ta na chysia moh ei ta, O lia deikua cha a chhôh liata hmo a ypazy ama moh.” a vaw tah.

Pastor chhôhkha, Pastor quarter nata Awnanopa quarter a tlôhpa ama châ khiahtacha Awnanopa eih (property) a châ na hawhta o nata a chhôh liata hmobaoh a ypazy cha a moh eih hlâta pha viapa ta mohhôh ta, a chado kawna chôta hmâpa he Awnanozy modyna zie a châ kaw nahta pangiasa a chhih.

Awnanopa hmobao (property) he Awnanopa phahnai ngiahna tawhta nata hriapasana tawhta chaleipa nata hneipazy a châ tahpa khâ a thei ngâ thlah hana chôta, pasô kawpa ta nata apha kawpa ta mohhôh awpa he nôzy maohphaona a châ.

5. Pathaihna (cleanliness) liata: Khizaw a sosâh via lymâpa liana heta pathaihna he moto nata chhôhto hro liata a ypa a châ. Khazoh hrohpa a chhytuhpa nata Ano raihria rôhna ngaitapa a hriatuhpa Pastor chhôhkhazy cha mohhropa chhôhkhazy hlâta pathaih via awpa ta hnabeiseihpazy ama châ.

Ochhôh nata hmobaoh hneipazy cha a pathaih kawpa ta mohhôh awpa châ ta, compound chhao a pathaih awpa a châ. Opa lyuhri châta rohchhiepa nata a hnykhaw theipa tawhta a vaih kaw awpa a châ.

Pastor o cha a compound nata ochhôhzy zachhih kawpa nata ngiaryh a chhi kawpa ta mohhôh awpa châ ta, palôhrupa nata sapa liata a tlâh leipa châta thadâhna su nata alyna su châ thei sala kho a chhih kaw aw. O chheihpa (compound) zy achu sala, nô hnatlâna ta a pahnie khiahta cha a chheihpâh liata pawpi nata thokô rihkôzy bô theipa châ sala, apha via pahchai aw.

Pastor O chhôh lia cha hriiah pathaih nata pathaih leipa moto ama y theina nata ngiaryhna su a châ awpa a châ. Chanota, châhnamei, sâdâ, khaini nata karaoh roh tlâ pahnâhpazy he hmo â ngia lei ngaitapa châ ta, Pastor chhôhkha mopatlâh a châpa tahpa ta rei theipa la châ tu aw vei. Kuva a nie leipa eima râh lia ama chy ngaita. Pastor nah chhohkhazy he kuva a nie leipa châ thei ei sala, za ama chhih via rili nata hnabeiseih a chhih. Pybiena châ tlô leipa – Pa-ôpazy taopa he pahno lei chhôh ta sôh hluhpi pahryuna châ ta, khisa aparaotuhpa chhao a châ hra. He hawhpa hmo liata sôh pahryuh thlâhthlipa he Beipa chhao ta pasaih hra vei (Isai 55:2).

Eima pôhpa he Khazohpa pahrâna o tahpa ta Bible liata maniah a chho (1 Kawrini 3: 16,17). Pôhpa cha Khazoh hropa pahrâna a châpa vâta a pathaisa lyhlia awpa he Krizyhpazy maohphaona lai ngaitapa a châ.

6. Sôh tluana nata hmâna kyh : Nô cha ochhôh-lyukah liata Manager châ ta, mohhôhna dâh a thai kaw khiata cha chhôhkha châta byhnâ rôhnah ngaitapa a châ. Ochhôh ativy nata ativyh lei he nôhrâhpa mohhôh thai nata thai lei liata a pahnieh kaw. He kyh liata peimawh chaipa cha sôh hmôna cha a kheihhawpa rai châ sala a pathai awpa a châ. Nôhrâhpa chhao sôh hmôna (hriapapuana) hnei thei hra ta, cha cha chhôhkha ativy viana a châ. Phusa hmôna/tluana liata Pastor lapinô taozie a châ leipa cha tao/hria awpa rai châ vei. Phusa/Sôh leipa ta khih a sa thai vei hra sala, chhôhkhazy uasa khao leina taihta soh tluapa dei pha hlei vei. Beipa bie chhao ta sôh tlaichhai tuna he moleina a châ zie maniah a chho hra (I Timothy 6:10).

Sôh cha ado kawpa ta hmôpa a châ awpa châ ta, Pastor chhôhkhazy cha Awnanopazy a piepasana tawhta nata phahnai ngiahna tawhta sôh hmô/daopa a châpa vâta, za a chhih ta, a pathaih hra. Ahraohrâ leipa liata tlâ hmâ chakhy pa he Beipa nata Awnanopazy za leina a châ. Chavâta, Phusa/sôh he a daihpa ta taopa a châ leipa vâta a chado nata a sosi kaw na chôta, a peimawhpa nata a ngiahna lia ngâlâh ta hmâ thai a chhuah lyhlia awpa a châ.

He kyh liata peimawh kaw heihpa cha pachhuahpanona phapa he a châ. Apakhona ta, thla kha liata sôh hmôna nata hma n’awpa ropa he hmo pha kawpa châ ta, he heta chhôhkha leibâ sei tawhta puana ryhpaopa atlôkheih tyh. Mohropa eih pathapa zy he Beipa ta pakhâ taraw leipa ta châhrasala reih papha hlei vei. Chavâta Beipa a saohiana chôta phusa zy he hmâ awpa a châ. Phusa a chadoh thaina he sôh pachôna pha chaipa a châ.

7. Daihti hmâna kyh (Time management): Beipa ta chyhsa zydua hnohta â kho kawpa ta miah a piepa a y chhôhpa cha daihti he a châ. Hmoto châta daihti hneipa ta taopa a châna zie Bible liata miah a chho (Biechhotuhpa 3: 1-8). Daihti a hmâhthaipazy ta a reileipa ta liata hmo phahnai awpa hluhpi tao hmâ ei ta, daihti sôhzie a pahnoleipa nata pachâ peimawh leipazy ta hria awpa hluhpi a daihti liata hria leipa ei ta, cha chata mopakha nata chhôhkha buana taih a tlôkhei tyh. China bieso ta cha, “Hmoto zydua he a daiti ta liata tao la, chatanacha noh kha he nohthôh haw a châ aw” ama tah.

Pastor o zy cha Awnano chyhsa ama charei chakâna su nata counseling a ngiahpazy ama pangai nawpa su nata Awnano program patohpatia chhielie leipa, a lei thei leipa ta hnei awpa byuh daihti a y thei aw. Chavâta mohropa zydua hlâta daihti hmâdâh thai pahchai awpa a ngiah ngaita.

Khizaw hmahsiena a vaw sosâh lymâpa liana heta eima niebaw tluana dâhzy a vaw nano lymâ ta, thokha a dawh taihpa ta rai a hriapazy y ei ta, thokha a zo lâta rai a hriapazy chhao y ei ta, eima daihti hmâna dâh a lyu tlâ vei. Pastor zy he Awnanopa kuphei hmeiseihpa ama châpa vâta program nano nanopa liata pua ta, a hlao awpazy ama châ. Amo he daihti avaona nata hmâna liata Awnanopazy thlalâ châ ei ta, amo ta daihti avao padopa ta a daihti ta liata program nata committee zy ama hlao/tlô theipa heta Awanopa zachhihna palâsa ta, member zydua chhao ta daihti sôzie nata a hmâdâh dopa ama pachu tahna a châ. Chavâta, daihti he yzie hnei kawpa ta hmâdâh a chu lyhlia awpa a châ (Hlazy 90: 12)

8. O chhô liata atobina:

Pastor lahpinô cha ochhôh liata a châpa chhao ta, a chysia cha za a chhi awpa châ ta, chysia â hmiepa, a mâ rutu leipa, sapa aryh kawtlôhpa, amo ta a ngia nata khopa dei châ leipa ta, vahpa nata sawzy ta ahmie ama tahpa nata mohropa mohmô lia chhao ta mo a ngiapa nata za a chhihpa chysia a tobi theipa châsala, cha chata ama zachhihna palâsa tuhpa chhao a châ hra aw. Bible liata “a ngiapa rakha nata a hmiepa rakha ta a tobi” (1 Timothy 2:9) awpa ta miah a chho.

He hleikhô ta, nô atobina pha chaipa cha Beipa china, palôhru pathaihna, alyna nata thaphanazy he a châ. Chazy cha khatinorai ta a tobi la, nâ vahpa châta chanô chhithai chaipa nata, nô khochhih chaipa, sawzy châta nata mohropazy châ ta na vaw châ aw.  Chatanacha, Beipa khaihna nata pha na cha na hmia liata âlâ aw ta, na piezie nata na pakah tawhta bie a puapazy cha nama cha palyupalih tuhpa avaw châ aw. Chyhsapa he ama tobina tawhna heta kheihhawhpa chyhsa ma a châ tahpa nata a nôchâ hrozi taihta khachâ rakha ma pahno theipa a châ.

9. Niebaw patohpatiana liata:

Bible liata chanô siapa niebaw patohpatiana liata a hriapasa zie nata a chhôhkha niepa nata ama ngiahpazy a patohpatia hleikhô ta, dyhchhiepazy nata bao angiahpazy chô liata a ku riaphana zie (Biesozy 31: 15ff.) miah a chho.  He heta niebaw patopatiapa he hmo rainaopa a châ leizie nata a piepasa abyuhzie a sia ngaitapa ta âlâ ta, he chanô siapa heta a seichanô ku lia ngâlâh ta hmotao awpa â pahnieh leizie chhao a sia ngâsâpa ta miah a chho hra. A chhôhkha châta a hriapasa vâna heta, a sawzy cha a chô liata aly kaw tyh ei ta, a vahpa ta reithai ta, papyupahly tyh ta, chanô zydua hry liata a phachaipa nata ano cha chyhsa to ta reithai ta za tlâh a châzie a reih. He chanô siapa hawhta Pastor lahpinâh cha ochhôh niebaw patopatiana liata a sia kawpa ta chhôhkha mohhôh awpa ta hnabeiseihpa a châ.

Niebaw patohpatiana kyh liata ta phusa mohpâpa ta ‘pachhuahpanohna’ (planning) phapa hnei awpa a peimawh ngaita. He heta ochhôh châta nohto peimawhpa (daily needs) zydua chaleina kyh a pahly khai. Nohto peimawhpa hry liata peimawh via pahchaipa (basic needs) nata hmobaoh peimawh hropa (secondary needs) liata phusa hmâna dâh chhao pathlua pathlâ thai kawpa abyuh.

Hmo peimawh kawpa heih cha hmo chado thaina chôta niebaw patopatiapa he a châ. A pakhona ta Nôhrâhpa kuh liata maohphaona a y tawh hnohkua tahpa ta khothi/khodâh hawhta hmâ chakhyh thlâhpa he Pastor lahpinô taozie awpa rai châ vei. He hawhpa liana heta a zyhzyhta ochhôh rairuna tlôkhei ta, nôhrâhpazy sialeina ta bai thei awpa a châ. Cha dei châ vei, ochhôh niebaw patopatiana phapa hneipa hlâ ta atobina (chysia) pachâ peimawh viapazy he Pastor lahpinô châta la a hmie raita a hmie leipa a châ. Chavâta kao toti liata mohôhna nata patopatiana phapa hnei awpa he a peimawh chaipa hry liatapa a châ.

10. Thlahchhâna chôta O chhô mohôh awpa:

Pastor lahpinô thlah a chhâ hoh leipa nama y nahta pangiasa a chhih vei. Thlahchhâna hro liata hroh ta, vahpa nata sawzy Beipa liata pavaosa ta, hlâ tyhpa nama cha sai nata hnabeiseih a chhih.

Chakhiahtala, na thlahchhâ tyhna dâh kha na palô a tlâh ma? Noh khata minute/ dawhkhazie chhôhta thlah na chhâ tyh? Suhraw liata sukha thlahchhâna daihti na pie/hmâ thei ma? Vahpa nata sawzy ama thyu hlâta thyupa ta na chhôhkha nata Awnanopa châta thlah na chhâ tyh ma?

Thlahchhâna he hro liata hnei leipa châta cha daihti eihhrâhpa hnei awpa he nô a buapa châ chhochhi cha hmo ru ngaitapa a châ thei aw. Châhrasala, eima Beipa Zisu tlai kha zawpi hluhpi hry liata ypa ta, a bua kawno chhao ta daihti eihhrâhpa tlua lyhlia ta thlah a chhâ tahpa Bible ta miah a chho (Mathai 14: 23; Luka 9:18).

Palôhrupa a pathaih (fresh) nota nata hmohropa ta maniah a pabua hlâta Beipa hnohta daihti a hmâpa he nôhrâhpa châta cha daihti ryhpaoh kawpa a châ. Ei kha cha ei viasa Pastor a châ ngâhaipa nôta message na vaw paphao ta, “Mohropazy bie na chho hlâta Abeipa bie a chho tua tyh mah y.” na vaw tah ta, ei palôh eina hria ngâsâ. Eima Beipa Zisu hmâh ta mydi thyupa ta thlah a chhâ khiatala keimo chhochhi a chhâ pahchai awpa eima châ (Maka 1:35).

Ruth Graham, chabu a rohtuhpa nata biechhotuh rôhnah pa Billy Graham lahpinô cha a vahpa thâtihpha chhopa ta a y nota pakhupaneih na chôta thlahchhâpa ta a daihti hluvia a hmâ tyh tahpa a châ. Ruth ta reih ta, “Thlachhâna he chanôzy châta peimawh ngaita ta, hmo hluhpi eima tao theileipa y ta, châhrasala Beipa ta a taothei. Ei pachâ tyhpa cha Bible liata biepipa “bâh leipa ta thlahchhâ teh” tahpa he chyhsa hropa zydua hlâta nô a buapa (busy) ta eima phahnai khei pahchai awpa a châ.” a tah.

Na chhôhkha châta na theina zydua papuapa ta, Beipa ta sona nata thatlôna a chapie na zie lymâ hawhta riahpha ngaitapa ta thlahchhâna chôta mohhôh la, na thei leina khô lâta Beipa liata na chhôhkha cha hlâ mah y. Ano ta na chhôhkha cha a cha mohhôhpa aw (Hlazy 37: 5).

12. Chhôhkha Maisâh paduana liata :

Pastor lahpinô cha chhôhkha Maisa a pachâ peimawh ngaita awpa a châ. Pastor zy sie-vaw abyuna daihti liata O chhôh apuasai theipa ama châpa vâta chhôhkha Maisâh padua kyh liata Pastor lahpinô zy cha vahpa chaima a lahtuhpa a châ. Chavâta, sawzy mopâpa ta chhôhkha a pakhyna hnei theipa châsala a pha kaw. Bible reih nata thlahchhâna ta tlyma, a bu tao ta reihpa ta tlyma, hlasana ta tlyma chhihthapa châsala, he heta sawzy cha ama thisaih liata laiseih khei aw ei ta, chhôhkha phapa ama padua thei hra aw. He daihti sôh ngaitapa he chhôhkha apasipa-aona nata pachuna châta chhao ryhpaoh kawpa a châ. Chavâta, chhôhkha Maisâh he chhôhkha ta Krista nata a zaona a châpa vâta nôhrâhpa ta thachhâ leipa ta a siekhei lymâ awpa a châ. “Chhôhkha phapa nata zahchhipa bieparu cha Zisu nata a zaona chôta chhôhkha siekheipa he a châ” tahpa ta Larry Christenson ta areih.

Bietlâpakyuna:

A chô liata eima rei hapa hawhta pawhrâhpa cha chanô luhpa nata chhituhpa châhrasala, ochhôh ryureina lai chaipa a patutuhpa cha nôhrâhpa a châpa hawhta, Beipa ta sona, novâhna nata thatlôna a piepa lymâ hawhta vahpa chakaona liata thapatlôtuhpa, sawzy Beipa lâpi dohpa liata chhihtha ta, palaiseihsa awpa nata chhôhkha cha atheina hawhta siapa nata phapa ta amohôh awpa he nô zy maohphaona lai ngaitapa a châ.

Pastor lapinôzy cha lapinô nata nô thlahthlipa châ leipa ei ta, a mo cha nôzy nô nata Awnanopazy nô ama châpa hawhta kyh totie liata mopâtlâh châ awpa ta hroh ta, ama nohto hro liata Beipa china chôta, a sohsi kawpa nata nawhna hro hneina chôta ama hrozi nôchâ liata Beipa palyupalih na chôta chhôhkha mohôh tuhpa ama châna my leipa ta khâ ama thei ngâ thlâh ha awpa a châ.

Chakaona nata chhôhkha mohhôhna liana heta nô nata pawzy maohphaona nata taotheina a kho lei kaw hra sala, ngiatlâh a chi kawpa ta, abaokhâ rairiena chôta hriaparaoh awpa deikua a peimawh ngaita. He kyh liata nôzy maohphaona a sâh via lei thai leipa ta, chavâta nôhrâhpa cha a nohto hro liata Khazohpa chi na chôta, kyhpachâna zy, thaphana zy, adyhna zy, nôphana zy, ngiachhienazy, phana zy,ngâchhihna zy, reisina zy, a sohsi theina zy (Kalatia (5:22) hneina chôta a chhôhkha liata maohphaona zy hria sala, chatanacha  a vahpa châta lahpinô khochhihpa nata ngâtlâh a châpa châ aw ta, Sawzy châta nô phapa a pahniehna tlâh a châpa tahpa ta ama za hra aw.

Abeipa ta byhnâ cha pie ei se. Amen.

(He Article he Dt. 25th November 2014 (Hriaheihnoh) ta ECM Pastor Lahpinozy chata Seminar pachhuahpanohpa Paper Present a cha. By admin)

One thought on “Pastor Lahpinô Maohphaona – Chhôhkha liata by B. Zihlua

  1. Pingback: Pastor Lahpinôzy châta Seminar hnei | ECMonline.org

Leave a Reply

Your email address will not be published. Required fields are marked *