Rev. Dr. Laiu Fachhai – Pahrâna maih liata Khazohpa châta ngâchhih awpa

ZAWSI HRO TAWHTA EIMA CHU THEI AWPAZY

Rev. Dr. Laiu Fachhai

Rev. Dr. Laiu Fachhai nothlahpa

By Rev. Dr. Lai U Fachhai.

Biehmiachhih:
Zawsi he Zakaw saw pahrawhleinopazy hry liata a hawti chaipa Benzamin a pazipa a châ. Saw pha kawpa châ ta, a paw Zakaw ta kyh a pachâ kawpa vata nata a mâsapa (a uhtazy nata a nô nata a paw chhao taih ta a hmia liata a bôhpa ta amâ naohna daihti a vaw tlô awpazie) vata, a uhtazy ta chhyh thai leipa ei ta. Nohkha cha a uhtazy lyurâhpa liata sahroh ama vaina lâ a paw Zakaw ta mo awpa ta tuah ta; ama o a kei tlôpa na ta, a uhtazy chata thieh awpa a chhuah ei ta, chahrasala ama hry liata thokha ta ama heihnawh pilâh hmeihseihpa thie thlah ha awpa cha a phapa ta pahno leipa ei ta, chatanachata Midia chyhsa sôhpaliepazy hnohta ama zua haw. Midia chysazy heta Izi râh Phiraoh abeina râh liata hyutuhpa pakha, a moh Potipha, hnohta Zawsi cha ama zua pachhuah. Chahrasala, a yna maih na ta a hmotaopa maih liata Zawsi cha Khazohpa china chôta y lymapata tao lyma ta, chavata Khazohpa chhaota Zawsi hnohta y hra ta, a hmotaopa maih liata thlaohchhipa ta a y lyma.

  1. ZAWSI A NÔ NATA PAW O LIATA A YNA DAIHTI (Joseph at his parents’ house) (Athaona bo 37):
    Zawzi cha a paw rei a ngia ta, a paw Khazohpa Jehovah chhao chipa ta a chhy hra. Athaona 37:2 liata eima hmô theipa hawhta, a uhtazy ta thathipa nata haiphiapa ta sahroh ama vaipa cha pha tah leipa ta ama paw Zakaw hnohta a chho tyh. He he ta a paw hmo hneipa cha ano hmo hneipa hawhta khâ a pachâ ha hrana zie a palâsa. Heheta maniah a pachupa cha, saw nata nawh Khazohpa lâ chhihthana kyh liata nô nata paw maohphaona a lai zie nata a sâh zie maniah a pachu. Eima nô nata paw ochhôh liata eima y nota Khazohpa eima pahno ha khiata cha, khataih su lâ eima siepa chhaota eima ngiapana â i laih lyma aw. Saw nata nawh zy hry liata kyhpachâ eih viapa nata khokhei eih viapa hnei lei awpa chhao maniah a pachu hra. Zawsi uhtazy moleina cha kao nanopa ta soh chy si la, ama paw Zakaw he ta, a saw hry liata Zawsi he a khokhei eih viapa vata a uhtazy heta ama hao pachai viana chhao a châ thei aw.

Atanoh Mara Krizyhpa thokha cha, eima râh liata eima y no ta ngiapatuh pha kawpa lyu pi ta, chahrasala eima râh hawka eima zo ti ta, eima Krizyna viahpakao pahluhpa ta, khizaw viahpakao tlao eima ky ha tyh. Eima yna maih liata Khazohpa châta ngâchhih awpa he Zawsi hro ta maniah a pachu.

  1. ZAWSI PAWTIPHA O LIATA A YNA DAIHTI (Joseph at Potiphar’s house) (Athaona bo 39):

A uhtazy ta Midia chysazy hnohta zuah ei ta, Midia chyhsazy ta Pawtipha lâ ama zua pachhuah hapa vata Zawsi cha thyudyupa o 17-pa a châ nota Pawtipha o liata sei ta a y pathao. Sei châpa hro nata raihria he hmo naopa châ leipa ta, chahrasala Zawsi cha a sei rai cha tiama kawpa nata ngâchhihh kawpa ta hria lyma ta, chavata a zibeipa Pawtipha he ta Zawsi cha ngâ ngâsâ thlah ha ta, a o liata raihria nata maohphaona zydua Zawsi hnohta a hla khai haw. Zawsi cha kaw pitloh via laihpa ta Satlia pôhraoh pha kawpa nata chhithai kawpa kaw châ ha ta. Chatanachata Pawtipha lapinô ta Zawsi cha khoh kaw ta, ykhei awpata a reipasao tyh. Zawsi deikua cha paryhsa ngai leipa ta, “Ei zibeipa ta na ngâpa ta he o liata hmoto zydua keima ku liata soh khai ta, nama deikua cha a lapinô na châpa vata keima ku ry liata y va chi, chavata he hmo na pahruapa he ei zibeipa ta kho leipa aw ta, kheitama he tlupo ta nâ ngâpa ei zibeipa kho leipa he ei tao thei aw!

Chahleikhô ta, keima cha Khazohpa hrohpa a chhypa châ na ta, ahy hmâhta na hmô vei hra ei sa la, Khazohpa hrohpa ta na hmô ta, chavata kheihta e, he tlu ta moleina lai ngaitapa ahe Khazohpa hnohta ei tao thei aw!” tahpata â chhy ha tyh. Nohkha cha o liata ahy hmâhta ama y lei nota, Pawtipha lapinô ta Zawsi cha reipasao heih ta, chahrasala Zawsi ta a pa-ei ha heihpa vata Zawsi cha patupakhi a chhuah ta, Zawsi deikua chata a râsai syulyu haw.

Heheta moleina cha a râ ta a râsai awpa a châna zie maniah a pachu. Zawsi heta he moleina reipasaona su tawhna heta a râ leipata a vaw y hapa cha sala, kha moleina kha pahnie leipa ta a y thei aw. A râ hapa vata kha molei reipasaona kha a pahnie haw. Paritheipa niedona su tawhtazy, chanôchapaw châna reipasaona su tawhtapazy, a tu a daina su tawhtapazy, kyhchhie thahia reina su tawh tahpazy he a râsai lyma awpa a châ. Chahleikhô ta eima chu thei heih awpa cha, chanôchapaw châna (sex) he Khazoh hmosaipiepa hmo pha kawpa châ ta, anodeikua nôpi-nôvah likaw lia deita ta hmâ awpa ta Khazohpa ta a pasai.

Eima lapinô nata a vahpa a châ leipazy liata eima hmâ khiata cha moleina lai ngaitapa a châ. HIV/AIDS hehawhta atanoh khizaw liata a pôh chahra kawna chhao he, chyhsazy ta “sex” he Khazohpa kho lei zie hawhta ama hmâ tu hapa vata a châ. Eima chu thei awpa a y via heihpa cha, moleina zydua he Khazohpa hnohta moleina a châ khai. Chyhsa ta maniah hmô vei hra ei sa la, eima moleina chhao pahno vei hra ei sa la, Khazohpa ta hmô khai ta, a pahno khai. Khazohpa tawhta eima nyu thei awpa khâpahmâh y vei. Eima vaw molei tlamaw hapa a châ khiata cha, eima moleinazy cha ano liata palâhâh ta â ngiathaina a haw awpa he eima tao theipa a y chhôhpa cha a châ.

  1. ZAWSI LÔ-O LIATA A YNA DAIHTI (Joseph at prison) (Athaona 39:20-41:40):

Pawtipha lapinô chata a noza bie nata Zawsi ta Pawtipha hnohta hmo yzie a chho aw tahpa a chi vata, Pawtipha cha haipa bie chho ta, Zawsi ta ano cha patuhpakhi awpa â chhuahna zie Pawtipha hnohta chho ta. Chatanatachata Pawtipha cha a pathi-iapa ta Zawsi cha lô-o liata khô ha ta. Zawsi cha lô-o liata a ypa chhaota a pha kawpata y heih ta, chatanachata lô-o biehneituhpa ta Zawsi cha ngâ ngâsâ thlah ha ta, lô-o liata biehneina zydua cha Zawsi hnohta a so khai haw.

Heheta maniah a pachupa cha, mosiapazy chhao he riethei ama tao thlah ha tyh hra. Pity eikhana bo 3:17 ta maniah a chhopa hawhta, “Hmo moleipa taopa vata pasa taopa hlata cha Khazohpa â ryh a tahna zie a châ khiata cha, hmo pha taopa vata pasa taopa he pha via tlôh ta.” Chahrasala, hmo pha taopa vata pasa a taopazy cha a chhâna liata cha cheihchalopa ta ama y tyh. Zawsi chhao he a chhâna lâta cha cheihchalopa ta a y haw. Heheta maniah a pachu via heihpa cha, lô-o liata a tâpa nata ahropa duahmo chhiena daihti eimâ tyhpa chhaota Khazohpa liata ngâchhih lyma awpa a byuh.

  1. ZAWSI ABEI-O LIATA A YNA DAIHTI (Joseph at the palace) (Athaona bo 41-50):

Zawsi lô-o liata â tâ chhôh kha Izi râh bei rôhnapa Phirao chata mâ noaâh chhih kawpa nata rarôh y kawpa sa la. Chacha ahyta hmâhata chhopasia thei tlâ leipa y ta. Phiraoh ry liata raihriatuhpa pakha lô-o liata patâ hapa, ahnôhlâ ta papua heihpa chata Zawsi ta lô o liata â tâ nota a mâsapa a chhopasiapa a do ngaitapa ta a vaw tlô hana thâtih a kaw thei ta, cha kyh cha Phiraoh hnohta chho ta. Chatanachata Phiraoh ta Zawsi cha lô-o tawhta abei-o lâ a vaw chhi awpata biepie ta.

Zawsi ta Phiraoh mâsapa cha, kô sari chhôh kôvei pha aw ta, cha khai tawhta kô sari chhôh chakâhna rarôh ypa a vaw tlô awpa kyh a châna zie a chhopa nata kô sari kôvei pha chhôh ta a phapa ta chakâh daihti kô sari châta pachô awpa â ngiahna zie a chhopa cha, abei palôh tlâh kaw ta, chavata Zawsi cha Iri râh liata “Prime Minister” rai piepa a châ haw. Biehneina lâta Phiraoh a pazipa, biehnei a sâh chaipa a sânona (number two) a vaw châ haw. Kô sari khai tawhta chakâhna thata a tlôpa vata Kana râh tawhta a uhtazy nata a hnôhla ta a paw chhao deichhy thei hapa ta, Izi râh lâ a zâ paih chy awpa ta ryh a raokhei thei ha hra ei.

Zawsi he ano a sapa kô 30 a kaw tlohna daihti liata Iri râh biehneituhpa kaw châ ta. Cha yzie cha kô 17 a châ nota a mâsana daihti tawhta Izi râh bei a kaw châna daihti likaw he kô 13 a châ. Kô 7-pa kôvei pha daihti khai tawhta, chakâh tlôna kô 2-na liata a uhta zydua nta a paw chhao chhôhkha zydua Iri râh lâ a zâ paihpa ta Zawsi biehneina ry lâ ama za ngia. Zawsi he ta a mâsapa a vaw tlô nawpa daihti he kô 22 chhôh tlai a ha. Heheta hmo pha to awpa nata a chhuahna hlaotloh awpa ta ha hoh â ngiahna zie maniah a pachu.

Keimo Marapasaw thokha cha, atanoh ta eima hmotaopa cha myla ta a theilâpa hmô pâ ha awpa eima khoh. Chavata, kô hluhpi khô lâta a theilâpa hmô thei awpa hmo nata rai zy hria hoh mapi. Hmo pha hmô awpa ta ha hoh awpa â ngiah hmeihseih. Ano a zuah hapa a uhtazy chô liata Zawsi cha viari thô khona palôh phao leipa ta â ngiathai ha ei. Heheta, viari a thô leipa ta a ngiathai veichâh ha awpa a châna zie maniah a pachu hra. Zawsi he biehnei a sâh ngaitapa liata a ypa chhaota, a palai leipa ta, nie paru hra leipa ta, a nawh ngaitapa nata kyhpachana nata adona chôta râh cha a chhihtha. A mopâ tlâh a châ hmeihseih.

Biepachhâna:

Zawsi thâtih eimâ chuna liata eima rei chanei ngâ thlah ha pa cha, “Khazohpa cha Zawsi hnohta y ta” tahpa he a châ. Hehawhta a châ theina chhâpa he, Zawsi ta Khazohpa cha a thei ta, ano liata khâchâ â pahnieh hapa vata a châ. Chavata kyhpachapa Marapasaw zydua saih y, khapa su liata nama ypa chhaota, kheihhawhpa rai nama hripa chhaota, Khazohpa khozie hawhta y lyma u la, Khazohpa chhaota nama hnohta khâ a y lyma hra aw. Zawsi ta tovyu chhie chaina, sei nata patâpa ta a yna daihti nata tovyu chôchhâh, abei ta ayna daihti zydua liata Khazohpa khozie hawhta a hro lymapa hawhta, nâmo chhao kheihhawhpa duasu liata nama ypa chhaota Khazohpa khozie hawhta vaw hroh lyma u la, Khazohpa ta a cha bao lyma hra aw ei.

Abeipa ta a Bie chyuhta eimâ châhkhei theipa cha eima zydua châta byhna maniah piepa se. AMEN.

Source: Maraland.net archive dated 2006.

 

Leave a Reply

Your email address will not be published. Required fields are marked *