Krizyhpa Chhôhkha by Rev. Chhuakhu Khithie

Introduction

“Phusa ta a to a tao thei” tahpa he atahmâ khizaw liana heta a vaw do kaw. Chhôhto ta sôh tluapa ta daihti maniah â khi thai leipa ta, Bible reina nata thlahchhhâ ta Khazohpa nata a kaona daihti rai hnei leipa ta mydi tawhta zâ reina taihta sôh tluapa ta bua chaimâh pi ta. Chhôhkha ta â ngiah chaipa cha sôh khiah maw eima tahpa alyu kaw. Sôh nata hneirôna he alyna châ haw sala, eima lyna pyu a paro kaw awpa ta pangiasa a châ. Atahmâ cha eima khihpi liata hmoto he vaw y haw hra ta, o rôhnah kawpa nata a chhôh ngiaryh a chhih ngâsâpazy sa pi ta, a pahrâpazy deikua yzie hnei tlôh pi vâ. Eima o nata pôhpazy chhao a ngia chaipa nata a sosâh thei chaipazy tobi chaimâh pi ta, eima othliahzy chhao mawtaw (motor) mârupa chi nanopazy ta ârâ phathi thei lei ngâna taihta pabie tlai pi ta. He hawhta a châ nota eima ochhôh deikua alyna pyu deikua ziahzi roh thlâh ha ta, eima tlyhmiazy cha mohropazy châta su chichhihpa ta tlao tao pi ta. He hawhpa khizaw nata âvâ ziza likawh liata chhôhkha padua pathi awpa liata maniah baotuhpa châta he châbie ropa heta kheihhawhpa kao liata tlyma maniah bao thei sala kho a chhih kaw aw na!

1. Chhôhkha Thabypa

  • Biehrai Parohpa liata :

Eima Biehrai tawhna heta chhôhkha paduatuhpa nata chhôhkha thabypa cha Khazohpa a châ tahpa âlâ pasia kaw. “Keimo lyupa, keimo kakuapa tlai ta chyhsapa tao ei suh u” tahpa nata “Chyhsapa ano deita ta a ypa he pha leipa ta, ano baotuh awpa ta kaolâhpa chyhsapa vaw tao tua sa…” (At. 1:26, 2:18) tahpazy heta Âdâ liata chhôhkha thabypa paduapa a châ tahpa eima hmô. Cha chhôhkha châna chata pachhuahpanohna sia kawpa hneipa ta biehneina nata tao awpa chhao pie hra ta. “Chatawhcha, Khazohpa ta amo cha byhna awpa ta: Khazohpa chata ama hnohta, ‘Chi hluhpi pathlapa ta pôhpa ta, aleilô he bie ula, nama reisai ta pa-ysa teh u; tilaipi liata a pie thaipa zydua chô liata zy bie hnei hra teh u,” tah ta (At. 1:28). He heta chhôhto he Khazohpa paduapa nata Khazohpa pachhuahpanohna liata â hlao ta, maohphaona a piepa eima châ khai tahpa a palâsa. He hawhta rôhnahpa nata maohphaona a sâh ngaitapa hneipa ta chhôhkha a vaw paduapa a châ. Châhrasala, Âdâ nata Ivy ta ama chhôhkha cha Khazohpa khodâh hawhta y leipa ta, moleina liata pao haw ei ta, Khazohpa pachhuahpanohpa hawhta y thei khao veih ei.

Khazohpa deikua a hnabeidy hlei leipa ta, â chhuahna hlao patloh lyma awpa deikua cha Biehrai Parohpa liata Abaraha cha khizaw tawhta aw papuapa ta chi rôhnahpa pathlatuhpa ta rao ta. A bietai hawh tlai ta ano tawhta chi rôhnahpa, Izarei pho, â pahrâna nata khopazy hlao patloh awpa ta Khazohpa chhôhkha (Abeipa qahal) ta tao haw ta. A pahrâ nawpa nata a khopa khizaw liata phuahluahna rai hria awpa cha ama châ. Ahyrai ta Ano liata pahrâ ta, a biepiepazy zyh awpa ta aw ta. “Khazohpa chata chyhsa matlupa cha chhôhkha hry liatazy pahlaosa tyh ta,” (Hla. 68:6) tahpa hawhta Hrohsopa Amawsa hnohta, “Namo deita he khizaw liata chhôhkha ei pahnopa châ ei chi ta; chavâta nama hmoparaona zydua liata eichâ hrie aw ei,”(Am. 3:2) tahpa ta reih ta. Ama chhôhkha chô liata luh chaipa nata ryureihtuhpa, ama hmoparaona liata chhao hrie awpa a châna a pahnosa ei.

  • Biehrai Thiehpa liata:

Biehrai Thiehpa liata cha Zisu Krista vâta Izarei thiehpa, Awnanopa cha thlahpa ta Ano pahrâna chata paduapa vaw châ heih ta. Cha Awnanopa cha Khazohpa khopa khizaw liata phuahna rai hria awpa ta a paduapa a châ. Cha Awnanopa liana chata ano â ngiapâtuhpa zydua ta pôhkha châpa ta pahrâ khoh ei ta. Krista abeina pa-i awpa nata a thâtihpha chhopa cha a rai pi chaipa nata paduana chhâpa cha a châ.

Cha Awnanopa, Khazohpa chhôhkha rôhnah kawpa liata pahlao awpa ta cha Khazohpa ta chyhsapa hnohta leilô pabie awpa ta bie a vaw piepa vâta, chhôhkha paduana châta chapaw nata chanô ahneipa ta chi pathla awpa ta rao ta. Cha liata chhôhkha a vaw duah papuapazy cha Ano moh phaohpa ta, “Krizyhpa Chhôhkha” tahpa a vaw châ haw. Awnanopa, Krista sapa khata a sahlao Krizyhpa chhôhkha kha pazao ta. Krizyhpa chhôhkha chhao ta cha Awnanopa cha pazaopa ta vârâh hmia palâsa awpa ta pôhkha chakaona rai cha a vaw hria. Awnanopa châna kipa cha chhôhkha phapa a vaw pôh lymâpa hawhta a vaw hlaotloh lymâ hra awpa a châ.

2. Chhôhkha Peimawhna

Chhôhkha he py (institution) zy hry liata uhthei chaipa, Awnanopa hlâ chhao ta uhthei viapa, Idâ sadô liata Khazohpa tlai ta a paduapa a châ tahpa eima vaw reih haw. Biehrai ta, “Khazohpa chata chyhsa matlupa cha chhôhkha hry liatazy pahlaosa tyh ta,” (Hla 68:6) tahpa ta maniah chhoh ta. He tawhna heta Khazohpa ta chhôhkha a pachâ peimawhna zie cha â lâpasia kaw. Awnanopa chhao ta chhôhkha pachâ peimawh ta, yzie hnei kawpa chhôhkha paduapa a châ thei nawpa ta Ahneina dâh patohpatia ta, eima sawnahzy cha a pha kawpa ta eima mohhôh thei nawpa ta nô nata pawzy bietaina eima hnei khai tawhta nawhhlâna chakaona tao heih ta. Eima sawnahzy châta Sunday School nata Batina achuna maniah patohpatiapa ta, kô 14 ama vaw tloh nahta yzie hnei kawpa ta Bati pachâsapa ta Awnanopa Dâh chhôh liata alypangia heih pi ta. He hawhta Khazohpa nata a Awnanopa ta chhôhkha a pachâ peimawhnazie he eima pahnopasia lei kawpa ta â lâ. Chhôhkha he ato zydua thabypa châ ta, chhôhkha tawhta eima pathao pado vei khiatala Awnanopa nata khitlâh phapa y thei aw vei tahna a châ.

Biehrai Thiehpa daihti tawhna khata Asia Minor râh (Turkey nata a chheipâh) zy kha Krizyhpa ama châ haw. Châhrasala kô zabi AD 6-na râhchhôh daihti liana khata khu râhzy khu Islam zyhna vaw zi hapa vaw châ khai ha heih ei ta. A chhâpa cha Kri vaw zyh tuapazy khata thina taihta ngâchhihpa vaw y hra ei sala, ama chhôhkha liata Krizyna vaw tu pa-i leipaa ei ta, ama pathla vaw sie lymâpazy cha Islam pachuna ta a vaw pahnie khai haw. Mongyuh râh chhao ama Achhyna-o hluhpi cha a rua haw tahpa reih hluh kaw bâ pi ta, ama chhôhkha Khazohpa bie ama tu pa-i leipa a châ nahta pangiasa a chhih. Chhôhkha rao (kai) hapa hluh ta, cha chhôhkha ruapa vâna chata Awnanopa ta tao ta, a chhâna liata Achhyna-o cha a vaw rua ha bâ. Ama Achhyna-o ruapa deita he reih hluh pi ta, a chhâ chaipa ama chhôhkha ruapa deikua reih hluh leipa pi ta. Keimo tlai chhao he chhôhkha peimawhna eima tlyhnypa ta a châ khiatala, eima Achhyna-o pha ngâsâpazy he pahrâtuhpa hnei leipa ta rua aw vei tah theipa châ vei.

Zu chyhsazy khu khizaw pho nata zyhna liata a sia chaipa pho ama châ nahta pangiasa â chhih. A chhâpa cha khâpa hropa châ leipa ta, ama chhôhkha liata Khazohpa bie khâchâ ama tu pa-ina vâta a châ chai. Mawsi Dâh ta â hnawpa hawh tlai ta chhôhkha â mohhôh ei ta, zyhna nata phoryhpazy chhôhkha liata âpachu ei ta (cf. Ryhpachaneina 6:4 – 9, 11:18-19, etc). William Barckay ta cha, “Zu nônahzy chata Dâh biezy cha ama sâhpiti nahta ama sawnah pie pakaoh tyh ei ta, ama sawnahzy chata Dâh biezy my awpa hlâta cha ama moh cheingei chhao my awpa a nao viapa ta ama pahno,” a vaw tah. Chhôhkha pa-i ei ta, ama ngiapâna pa-i ei ta, chavâta a huary thlâh ha veih ei.

3. Krizyhpa Chhôhkha Thapi Phiana :

‘Krizyhpa chhôhkha’ tahpa reihkah he atahmâ hlâ eima râh liata reina a hluh kaw. Awnanopa thokhazy cha kô reipi tawhna khata atanoh taihta Krizyhpa chhôhkha tahpa biepipa hneipa ta Campaign zy thata vaw hnei haw ei ta, yzie deikua hnei thei âh kaw vei. Eima râh liata hmahsiena vaw sâh lymâpa heta eima hro nata khihsanazy thata vaw panano ta. Raihriana nata nietluana su âlyupa lâthlôh eima chhihna daihti liata la âchhihthapa chhao a nao via tyh. Atahmâ deikua cha eima râh nata pho hmahsiena vâta lâthlôh hropa â chhih awpa vaw hluh ta chyhsapa chhao âlyu tlâ khao leipa pi ta, Thatihpha chata lyurâhhripa china maniah pahlei haw ta. Tawhla, Khazohpa zana nata china tlao hnei khao heih tlôh leipa pi ta. Chavâta, Khazohpa chhao a chi leipa, ahripa chhao a chi leipa, khâpa hmâh chipa a hnei leipa hawhta chyhsa hluhpi cha khih eima sapa a châ chai. India sawhkhâ tawhta eima râh ta baona a daopa nata a saipa ta raipa vaw hluh ta. Politics pahnona dâh âdo leipa vâta eima pho he thathina nata aohraohna ta maniah patu ta. Chavâta, Khazohpa bie âchhihthana phapa nata â ipa chhôhto ta hnei ta, thapi phiapa ta he lâchhâh he palôhrupa eima pie bâ awpa abyuh ngaita kaw.

ECM Assembly ta atahmâ khizaw hmahsie via lymâpa liata chhôhkha a peimawhzie pahnopa ta kô 2013 Assembly ta, Family Guidance and Counseling lâchhâh hma eima sie thei nawpa ta “Family Guidance and Counseling” padua awpa ta vaw pathlu ta. He bie pathlupa â laichadaipa ta December 1, 2013 khata Family Guidance and Counseling Centre (FG&CC) cha pahypa ta pathao patopa a vaw châ haw. Kô 2014 Assembly ta 2014 he Krizyhpa Chhôhkha paduana kyh liata chhôhtozy ta â chhihthana phapa eima hnei thei nawpa ta thatlô viapa ta hmahla awpa ta FG&CC heta maohphaona a vaw la haw. Awnanopa tota Krizyhpa Chhôhkha Committee padua awpa ahawna chhao a vaw taopa kha a châ. Local Church tota Krizyhpa chhôhkha Committee zy cha FG&CC nata â pazao awpa nata raihria khoh awpa ta hnabeiseihpa eima châ hra.

4. Krizyhpa Chhôhkha phapa padua awpa hmah eima la awpazy :

          1)   Chhôhkha a chhihthana phapa hnei thei awpa ta thapi phiapa.

          2)   Chhôhkha apakhyna hnei thei awpa ta thapi phiapa.

          3)   Khazohpa Achhyna apakhyna pachâ peimawh awpa ta âpachuna.

          4)   Suhrawh sukha pie khai thei awpa ta thapi phiapa.

          5)   Nieparu bawparuna tawhta aboh awpa ta chhôhkha apachupa.

          6)   Hriapapua nata âhmiepa ta hroh awpa nata khihsa awpa ta âpachupa.

          7)   Chanô chapaw moleina tawhta aboh awpa ta chhôhkha pachupa.

          8)   Paritheipa tawhta aboh awpa ta chhôhkha pachupa.

          9)   Ahneina Pathaihpa ta ahnei awpa ta thyutliapazy chhihthapa.

          10) Awnanopa pasâhsa ta pachâ peimawh awpa ta chhôhkha âpachu awpa.

4.1. Chhôhkha a chhihthana phapa hnei thei awpa ta thapi phiapa:

Atahmâ hlâ rairuna a hneipazy hry liata a hluh chaipa cha nôvah likawh buana nata rairuna a hneipazy, sawzy mohhôhna kyh liata rairuna a hneipazy, mopakha hro liata rairuna a hneipazy ama châ via chai. He rairuna a hneipazy he chhôhkha âchhihthana phapa hnei ha ei sala, he rairuna he ama tyh awpa pangiasa va na. He hawhpa tawhna heta chhôhkha âchhihthana phapa eima ngiahzie â lâ pasia kaw.

Kaolâh awpa tluana kyh liatazy, ahneinazy, o-lyu paduana nata nietluana kyh liatazy chhôhkha heta âchhihthana phapa â ngiah ngâsâ pi ta. Tawhla, chhôhkha daihti hmâdâh – amôna nata thyuna daihtizy, pati nie daihtizy, chhôhkha pakhyna hnei daihtizy yzie hnei kawpa ta a taopa nata a hmâh tyhpazy ochhôh liata cha byhna hluhpi a tlô tyh.

Eima Biehrai liata, “Achhihthana sopa y leina liana chata chyhsazy pao tyh ei ta; ryhrao thaipa hluhna liana deilua chata abohna a y” (Bis 11:14) a tahpa hawhta chhôhkha achhihthana phapa nata patohpatiana siapa liata cha atu adaih awpa chhao aryh thei ei ta, achhihthana pha leina liata deikua cha aryh chiehpa liata chhao ama buabâna a tlô heih tyh. Chhôhkha achhihthana phapa chata atahmâ nata daihti kaw y awpa liata thadâhna, phana nata thaphana thata maniah tlôkhei aw ta. Chhôhkha maluh zydua ta ama tovyuh do ngaitapa chhao ama to tyh hra.

4.2. Chhôhkha apakhyna hnei thei awpa ta thaphi phiana :

Krizyhpa chhôhkha nohthlapa he roh awpa châ haw sala, o-lyu rôhnah ngâsâpazy, sôh nata piah nata mawtaw pha ngâsâpazy roh leipa ta Khazohpa achhy ta chhôhkha ama bôh ngâ haino nohthlapa he eima roh nahta pangiasa â chhih. Cha hawh pyly chata Chhôhkha sôhna liah-mari chaipa na hiahhri ei sala, kheihta e eima chhy aw? Chhôhkha ta Khazohpa hmiakô liata eima pahkhu panei ngâ haino he eima sôh chai daihti he a châ nahta ei pangiasa tyh. Bieso sâkha cha, “Chhôhkha thlahchhâ khoh tyhpazy chata ama pahrâ khoh tyh” (Family that prays togather, stay togather) a vaw tah cha maw!

Chhôhkha apakhyna cha khoh pi ta, châhrasala reipasipasuana nano nanopa tao tyh pi ta, âpakhy hmâ tyh ma pi. Khazohpa ta noh kha ta dawh 24 maniah pie ta, cha liata dawh khophie dâhdei chhao ano châta pie thei leipa chhôhkhazy heta taochhei eima tah tlyma? A pabohsana vâta hriapasa theipa châ pi ta, ano achhy daihti liata eima hoh tyh leipa he eima tao pado rai tly ma? Mizoram Chief Minister heta eima chhôhkha he noto bie maniah chho awpa cha sala, hmâ leina daihti rai hnei leipa aw pi ta, tlao eima khohtlâh kaw aw. Chanota eima hrona âvaotuhpa, alei nata avâ Beichaipa ta nohto ta maniah pahlao awpa khoh ta, bie a chho hmâ leipa eima châ khiatala kheihhawhpa chhôhkha cha ma eima châ haw vâ tly? Mylâ hânoh liata chhôhkhazy heta nôpo chhâna daihti eima tyh tita la, Bei Zisu thlyu thlyu he eima ngai awpa nata bie eima chho khoh awpa a vaw châ heih aw.

Eima râh liata a mohta deita ta Krizyhpa eima hluh tu hâpa vâta a châ thei ngyu aw, chhôhkha liata Khazohpa achhyna abyuhna pahno leipa eima hluh kaw. Alynabie rei awpa nata hia awpa eima hnei hluh thlâ bao nahta chhôhkha ta Khazohpa achhyna buakha daihti chhao hnei thei ma pi. Cha hawhta eima châpa vâta chhôhkha liata hawti vaw laiseihpazy pachâchhie a chhih via ei ta. Tahmâ hlâ moleina liata ama pao nao viapa chhao a châ thei aw. Tawhla, khizaw hmo liata chhao ârâ chatlie via ei ta, nôpi-nôvah ama tluana liata chhao khizaw kawpa ta ama hroh tyh. Ama pathla vaw y lyma awpazy chhao ta Khazohpa zana hro a phahla ei ta, chi ama chhih via rili tyh.

Moto heta eima chhôhkha chyu he Khazohpa achhyna kyh liata nata hmo hropa eima chuna su hmiatua chaipa nata peimawh chaipa a châ. Chhôhkha paduatuhpa cha Khazohpa châ ta, mohhôh pazi ta, byhna hluhpi ta a vaohei tyh. Mopakha deita reipa hlâta chhôhkha cheingei ta rei awpa abyuh. Ziza nata nohkhaipazy, hnatlâna nata nie nata do awpa maniah piepazy, eima ngiahpa torai he Ano tawhta eima daopa sai a châpa vâta alynabie reih awpa eima bâh.

4.3 Khazohpa Achhyna apakhyna pachâ peimawh awpa ta âpachuna:

Eima hro pado awpa nata lâthlôh dopa a chhih awpa ta maniah baotuhpa pha chaipa cha Khazohpa Achhyna-o lâ ngaipa he a châ. Khazôhpa Achhyna-o liata apakhypa hlâta hmo hropa eima pachâ peimawhpa a hluh tupa heta chhôhkha a tao tyh. Khazohpa nata azaona dopa eima hnei chyu thei nawpa ta Khazohpa Achhyna-o liata apakhy hluh awpa ta thapi eima phia awpa abyuh kaw bâ.

Awnanopa apahlaona liata â hlaopazy, Abeipanoh pathaisapazy, Ano achhy khoh awpa ta apakhypazy he ngiapâtuhpa, Krizyhpazy tao awpa nata maohphaona a châ. Bible su hluhpi liata Khazohpa ta chyhsapa a taona chhâpa cha Ano reithaipa ta palyupalihpa ta âchhypa he a châ tahpa maniah a chho. Hrohsopa Isai ta, “Hy chyhsa keima châta ei taopazy heta eina reithaina ei ama phuah thei nawpa ta,” (Is. 43:21) tahpa maniah a chho. He Biehrai châh heta chyhsapa cha Khazohpa achhy awpa nata reithai awpa a châna eima hmô. Âchhy khoh vei khiatala taopa a châna chhâpa chhei ha ta, a taotuhpa adyuh ta, a molei haw tahpa eima pahno thei.

 

Atahmâ cha thatihpha vâta Khazohpa byhnâ kao nanopa hluhpi liata dao pi ta. Châhrasala, cha byhnâzy chata chhôhkha liata lôhraoh kawpa ta hmo tao khohpazy rairuna maniah taopa haw ta, chhôhkha hro chhao thata a parao ngâ haipa alyu. Eima nietluana rai nata hmo hropa vâtazy pati dôh khohna daihtizy, my thyu daihtizy nata amôna daihtizy taihti maniah panano haw ta. Tawhla, Khazohpa byhnâ hropa – Computer, TV tawhtazy eima Achhyna-o Program hlâta thapha âchhih viapa nata hmô byuh viapazy, eima ochhôh cheingei tawhta hmô thei awpa vaw hluh ha bâ ta. Cha chata Khazohpa Achhyna-o apakhynazy maniah pahla pathao ta, apakhyna hlâta hmo hropa a pha viapa tao awpazy khona vâta Khazohpa Achhyna-o cha tlao eima tlyhny haw. Keimo byuhna nata khona kyh liata lâthlôh eima paviapa he Khazohpa ta âhao chaipa a châpa vâta kao nano nanopa liata Khazohpa eima pachâ leina theilâpa cha vaw pahthei pathao haw ta. Eima râh he a vaw pasa hapa a châ.

Atahmâ daihti liata cha Abeipanoh ta Khazohpa achhy ta eima cha-yna parao theituhpa eima tyh hluh kaw bâ. Nie nata baw tluana kyhzy, viasa sahlaozy chhao ta a pa-eihpahrâh khohnazy vaw lai lymâ ta. Abeipanoh cha-y awpa hlâta Weekend pasô viana zizazy a vaw sâh lymâ ta. Chhôhto ta hezy tawhta eima boh thei nawpa ta thapi phia awpa â daih kaw bâ. Khazohpa bie ta, “Nama hro he kha a chado muh vy” (Zer. 17:21) a tahpa he a thei chanei heih ei suh u. Eima hro he thata â thla tlô ta.

Atahmâ he Chhôhkha ta Khazohpa Achhyna-o lâthlôh a chhih beih leipa, chhienoh phanoh daihti liata ngâlâh Awnanopa ângiahpa chhôhkha eima y haw. Chyhsa thokha cha ama tlâh nota Khazohpa achhy beih leipa, ama thina nahta ama ri deita ta Awnanopa âpakhy kheipa eima châ hôlô bâ. Mongyuh rah Awnanopa thachhâzie reih haw pi ta, amo cha kô sâh hlei uhtheipa châ ei ta, eima Awnanopa deikua he zakha tlâ châ chy pi ta, he hawhta eima y thlâthli khiatala kô 500 uhtheipa châ haw sihla khâpa eima lyu suahluah vâ tly? Eima Achhyna-o hluh viapa he eima khaw thlâh haw thlyu aw na! Chhôhkha tota thapi phia pathao heih ei suh vy.

4.4 Suhrawh sukha pie khai thei awpa ta thapi phiapa:

Nohto ta eima khihsana châta sôh he peimawh tlai ta, moto ta sôh he khoh pi ta eima ngiah hra. A hnei theina dâh chhao tlua eima tlua tyh. Ahyhmâh ta sôh he khoh awpa ta pachu angiah leipa pi ta, eima hro liata âbai chiehpa a châ. Sôh khopasana dâh deikua a rakhapa eima pachu awpa abyuh kaw. Atahmâ duasu liata sôh he chhôhkha a duah papuana thabypa a châ nota, chhôhkha raona thabypa chhao a châ hra. A hneituhpa ta a hmôna dâh nata a hmâna dâh reizie ta a chhiena nata a phana lâta hro pei a tlôkhei theituhpa a châ tyh.

 

Krizyhpa chhôhkhazy cha chhôhkha apakhyna nata Achhyna-o apakhyna hleikhô ta eima hneina tawhta suhhrawh sukha nata hmo hropa eima pie cheingei awpa a châ. Bei Zisu ta a Paw hnohta, “Hmo zydua nâma eih cha keima eih châ ta, keima eih cha nâma eih a châ,” tah ta (Zh. 17:10). Chhôhto ta Khazohpa hnohta, “Nâma eih cha eima eih a châ,” tahpa ta a byhna dao awpa khoh pi ta, eima hnabei a seih tyh. Reihkah hlâta cha eima hmo hneipa eima piepa heta eima piepa (a daotuhpa) nahta eima pazaona tao pahthu via ta, kyhpachâna nata khokheina a palâsa hra. Khazohpa chhao he reihkah deita ta achhy ngâ thlâh ha tyh ei sihla, suhrawh sukhapa dâhdei chhao eima pie pasaih tlôh leipa chhôhkha eima châ khiatala, ano nata eima zaona cha a sia nawpa hawhta sia thei aw vei. Chavâta Krizyhpa chhôhkhazy cha Khazohpa hnohta hmo eima piepa hleikhô ta eima opa lyuhripazy châta chhao eima riapha awpa a cha. Pihpathi siapa cha ama pipathi hlâta chyhsa riakhieh kawpa chhao vaw châ ei sala, ama vaw pihpathi tawhta cha riapha kawpa ta Khazohpa achhy ei ta, mohropa châta chhao byhna ama châ tyh.

Zyhna to heta keimo eima chhypa khazohpa eima pahnona dâh hawhta eima hroh. Hmo a pie beih leipazy chata hmopie â chhuah beih leipa ei ta, keimo Krizyhpazy Khazohpa he cha hmo pietuhpa a châpa vâta ano ângiapâtuhpa nata achhytuhpazy heta cha a hnohta hmo pie lei theipa châ ma pi. Khazohpa hnohta hmo piepa ato maniah pietuhpa hnohta Khazohpa khozie eima hly theina daihti ryhpaoh chaipa a châ. Chyhsazy ta Khazohpa hnohta hmopiepa sôh nata pia ama hlâpa vata ama leina bie rei awpa pahnopa ama sôh kaw nota, âthôhna nata byhna ta Khazohpa a vaohei hmeiseih ei tahpa rei awpa hneipa deikua ama hluh kaw heih. Tawhla, riaphana he Krizyhpa hrozie dopa a châ hra. Pietuhpa hnohta byhna patlôsapa he Khazohpa raihria, chyhsapa châta ryusôh chaipa a châ. Chyhsa riakhiehpazy he khizaw liata chyhsa âly lei chaipazy ama châ. Keimo chata pachô pakhy ta Khazohpa lâta a hnei leipa (pachô leipa) cha chyhsa sipasa chaipa ama châ. Khazohpa hnohta hmo piepa he vârâh liata ryu pachôpakhy theina ryhpaoh chaipa a châ hra (Luka 12:33, 34).

4.5 Nieparu bawparuna moleina tawhta chhôhkha aboh awpa apachupa :

Sôh nata pia âchadaina vâta Abeipa nata chhôhkha pachâ khao leipazy heta a chhiena lâta a theilâpa cha a pahthei pathao ngâ kaw tahpa pahno thlâh ha ei suh u. Cha hawhta a tao tyhpa chhôhkha liata ama sawnahzy rao ei ta, ama sôhzy cha khâpahrao leipa ta thlai pachhâ tyh ei ta, sawzy chata ama nôchâ hrozie thata parao tyh ta, sahma nata drugs parina ziza ta chhôhkha nôpona thata a vaw tlôkhei tyh. Sôh nata piah âdo âh kaw leipa ta vaw la tyhpazy cha sôh he hluh via ngâ kaw hra sala, âdaih lei via rili tyh ei ta. O nata lyuzy rôhnah via rili ta, châhrasala a chhôh liata hro cha riethei â chhih via rili tyh. Nie nata baw pahâh via rili ta, eima pakah deikua la pahâh via rili hlei vei. Khisana kyh liata pha via heihpa khona nata mohropa eih uahvanazy chata avyuhna (nieparu khohna) palôhrupa maniah pahneisa ta, Khazohpa nahta achhaihna taihta tlao a vaw tlôkhei ha tyh. “Nâmo ku ta hria awpa ta nama chhuah nawpa ta, …. Khapahmah apahla thei aw veih ei chi,” (1 Thes. 4:11-12) tahpa ta Khazohpa bi eta maniah pasyuna he Krizyhpa chhôhto bievaopa vaw châ lymâ mawh sy.

Avyuhna heta maniah pahnie ngâsâ bâ ta, eima bierei kahthlapa liata chhao hmâh hluh kaw bâ pi ta, noza a chhih kaw. He chhao he chhôhkha achhihthana sia leipa ta a taopapuapa a châpa ta âlâ. Khazohpa bie ta, “Thlahpa keimo liata a pahrâsapa chata hiatliana taihta maniah a khoh” (Zam. 4:5). Ngiapâtuhpazy cha hmo do leipa eima taopathlei hapa chhao ta keimo liata Khazohpa thlahpa ypa khata maniah hiatliapa vâta ângiapachhi lei thei ma pi. Ku tloh leipa ta sôh thata lana chôta eima ly kawpa a châ khiatala Khazohpa thlahpa hiatliana hnei ma pi tahna châ aw ta, chyhsa ngiachhie â chhih chaipa eima châ aw. Chavâta Krizyhpa chhôhkhazy sôh lapangiana nata hmo hropa eima hneipa zydua he, “He he Zisua vâta keima eih,” tah khai thei awpa awpa a châ. (cf. Bis. 13:7, 11; 15:15; 16:8; 20:21; 28:6; 30:8). Abaraha ta avyuhna a kho leinazie kha âmopâtlâh a châ kaw. Sawdawma bei hnohta, “La ri sakha chhao na hneina tawhta la aw va na… Abaraha cha keima ta ei pahneisôhsapa ma a châ ta’ na tah thlei aw na,” a tah thlâh ha. Cha khai tawhta Khazohpa ta a hnohta, “Abara, kei he na vyhphao nata na lymâ rôhnah ngaitapa cha ei châ,” tahpa ta bie a vaw chho pazao heipa a châ (At. 14:23; 15:1).

Khihtlâh moleina heta chhôhkha liata thari a pathla lymâ tyh. Chhôhkha âchhihthana pha leipa liata cha avyuhna tahpa a châ ngâ thlâh ha tyh. Khazohpa pasai leipa vaw paru tua chaipa Âdâ zy nôvah ama châ. Âthôhna cha rei lei, thluahruapa deita hmô ei ta, Khazohpa chhiesapa ama châ lymâ. Anania zy nôvah chhao kha ama nieparuna vâta ama thikhei hra tahpa khâ âthei ei suh u.

4.6 Hriapapua nahta a hmiepa ta hrohpa nata khihsa ngâh awpa ta apachupa:

Eima bie thabypa “phusâ ta khâpa rai a tao thei…” tahpa khi atahmâno chhôhkha hluh chaipa liata cha âdo thlyu aw na. Sôh nata piah âchadai tuna vâta chhôhkha hluhpi cha rao ei ta, hmahsiena chata viasa uahvana a vaw chakaih ta, viasazy uahvana chata hnei via lyma awpa khona – o nata lyu, ochhôh chhaichhi pha viapa nata mâru viapa khona vaw tao papua ta, uahvana nata khona, khopasana chata eima pathi palôhzy pabie khai ta, eima lapangiapa ta âdaih leina khôlâ ta uahvana nata khopasana chata eima hro liata hmo pha leipa nata a puapa maniah pataosa ta. Eima lapangiapa nata âhmiepa ta hroh awpa nata khihsa awpa eima thai khao leipa a vaw a châ tyh. A nawh kawpa ta hroh ngâhpa, leibâh nata dyucheipa tawhta abohpa, hro liata phaohri tawhta eima pie awpa abyuh. “Rai hria leipa ei ta, tlâ ama y chakhyh tyh. Cha hawhpazy cha a thli thlâh hapa ta hria awpa nata amo viahchha nie awpa ta Abeipa Zisu Krista liana chata biepipa ta ei pasyu,” (II Thes. 3:11) tahpa he Khazohpa bie a châ. Biehria ta, “A hria leipa cha a nie chhao nie khah se” maniah tah ta, Khazohpa heta pati pahâhpa nata sa ta khâ maniah chyh aw vei. “Ama phahla beih lei nawpa ta rai phahnaipa hriapa ta kha â hmâh lyma awpa ta pasyu la, ama y chakhy awpa châ vei” (Tit. 3:14) tlao a vaw tah.

Hmahsiena heta heihzy uahvana â vaw chakaih ta, heihzy uahvana chata tiama kawpa hriapapua awpa hlâta a naosia kawpa sôh hnei awpa khona vaw tao papua ta, sôh palangiapa hawhta hroh ta khihsapa eima vaw thai khao vei. Sôh lapangiana lâta chhâna (limit) a hnei nota eima hmâ khohna lâta chhâna hnei leipa (unlimited) tlao a châ. “Phusâ he sei hmâtlâh châ kawpa a châ nota hyutuhpa pathichhie kawpa a châ,” ama tah. Sei hawhta hmâh leipa ta hyutuhpa châta a hmâhtuhpazy chata ano kha sôh sei liata thlai ângia a, a hnei hluh via nahta khohlei a khoh via tyh. Bible ta cha, “Taka nata sôh kyh a pachâtuhpa cha tâkâ phusâ cha a khokhina taihta hmô beih aw vei,” tahpa.

Krizyhpa chhôhkhazy cha sôh nata pia chôchâh liata palôhru dopa eima phaoh awpa eima ngiah hmeihseih. Lyuhchâpa Pawla ta, “Hneirôpa ta y dâh thai na ta, phahlapa ta y dâh thai na ta, pybiepa nata nodipa ta y dâh bienyupa ei pahno haw,” (Phil. 4:11). Krizyhpa chhôhkhazy cha eima riethei hapa chhao ta rietheipa ta y dâh hawhta y awpa châ ta, eima rai a vaw ru hapa chhao ta rairupa ta y dâh eima thai awpa châ heih ta, cha cha eima lapangiapa nata âhmiepa hro nata khihsa dâh bierupa cha a châ. Eima hneipa liata palôhtlâh thei leipazy ta nieparu awpa khoh ei ta, hria hoh leipa ta a pahâh pahâhpa a nie khohpa chata hmo a paru tyh. Chavâta hneirôpa nata rietheipa ta y dâh bierupa he hnei awpa ta âpatohpatia chyu ei suh u. Râh nata chhôhkha ta eima chi tu leipa sathei hria awpa âchhuahpazy, eima chysia a châ leipa a tobi âchhuahpazy, hriapasana vâta châ leipa ta a naosiapa ta hnei hluh âchhuahpazy âduah papua beih aw veih ei.

4.7 Chanô chapaw moleina tawhta âboh awpa ta apachupa :

Khizaw chyhsa mohpathâhpa hluhpi ama vaw paona, chhôhkha hluhpi ama raona chhâpa nata râh nata râh likawh buana taih chhao ta a tlôkhei theipa hmotaotheina rôhnah kawpa tahpa ta athaipazy ta ama rei tyhpa cha Sex he a châ. Eima râh heta he hawhpa lâchhâh âpachuna eima phahla kaw nota aru lâta he moleina â hmâh tyhpa deikua eima hluh kaw thlyu aw na.

Khazohpa ta chyhsa tao ta, ‘chi a pathla lymâ awpa’ a vaw tah (At. 1:28), cha chata sex he nôvah likawh liata a pathaih kawpa ta kyhpachâna kih tlô nawpa ta a taopa a châ tahpa a palâsa. Sex eima reipa heta pathaihna a chakaih pâ tahpa he pahno tyh ma pi; he vâta sex chôchâh he chhôhkha liata reih thei leipa pi ta, âpachuna lâchhâh chhao eima tlyhnypa alyu kaw. Khazohpa hmo maniah piepa sôh ngaitapa he hmo pasichhih chaipa, rei awpa nozachhihpa, maohphyuhna hawhta eima pachâ ha khiah ma tah theipa a châ. Sex chôchâh liata information eima daopazy he cha thyutlia hluh chaipazy cha viasa thokha (a pahnopasia hra leipa) zy tawhta a châ khoh kaw tyh ta, chhôhkha nata Awnanopa tawhta Krizyhpa khozie ta âpachuna a y tlâ leipa vâta a châ.

Sex chôchâh eima pachâdâh âdo leina chhâpa he eima pahno awpa âdopa tlao pahno leipa pi ta, a chyhta ngâlâh eima pahnopa vâta a châ thei. Sex chôchâh reipa he eima noza ta, zamawh hawhta khâchâ eima pahnopa vâta Maihsâh liata rei awpa ngâh leipa pi ta, sawzy kiahpâh liata rei awpa chi ta pachâ heih leipa pi ta, châhrasala he hawhta a châ nota eima kho leinazie ta eima sawnahzy cha information âki lei kawpa vaw dao heih tlôh ei ta. Atahmâ hlâ Media nano nanopa liata ama palâsapa hluhpi sex chôchâh he a châ thlyu aw na. Krizyhpa âpachuna nahta ahmie lei hleipa lâchhâh palâsana a châ tyh hra. Thyudyupa palôhrupa nata pôhpa mei hawhta a ia ngâ haino ta maniah tlahnaoh ta chyhsa hluhpi cha akuah thei tyh ma pi.

Lyuhchâpa Pawla ta Rawma mozy hnohta, “Sahma dona nata sahma paripa ta y leipa ta, parâpa nata aphei hmâhpa ta y leipa ta…” (Rawm. 13:13) tahpa ta maniah pasyu ta. Biehrai Parohpa nata Thiehpa daihti nata atanoh taihta moleina âlâluahpa nata chhôhkha a parao chaipa cha paritheipa nata chanô chapaw likawh moleina a châ ngâ thlâh ha. He hawhpa rairuna avaw tyh hapa chhao ama vaw hluh kaw bâ. He heta chano-chapaw likawh moleina chôchâh liata chhôhkha âpachu ta a pathaih kawpa ta y awpa ta eima pasyu awpa abyuhnazie a palâsa.

4.8 Pari theipa tawhta aboh awpa ta chhôhkha âpachuna:

Phasana khotuna nata niedo liata khizaw kawpa ta khihsa awpa khona hluh ta mopakha nata chhôhkha chhao cha chata maniah a parao pathao haw. Khizaw lâchhâh a palypa-uasanazy khona cha thata a vaw lai haw. AIDS, chyhsapa liata pasana a vaw dyuhtuhpa, pasana hri vaw thie khai theihtuhpa cha moto chô liata khichhai khao leipa ta. Chyhsa pakhazie tlyma cha maniah a kiah ha tahpa pahnopa a châ haw. He hlâta hluh viapa cha paritheipa ta a pabua ngâ hai hra.

Eima râh liata paritheipa hmâh thai leipa eima thyutlia hluhpi he chhôhkha kaipa (Broken Family) tawhta ama hluh chai ama tâh. Kô lâta chhao kô 15-30 likawh ama châ via chai. Kô 30-50 likawh heta sahma ngâlâh ama doh via chai hra. He thyutlia sahlaozy he nietluana lâta rai a hnei leipa, a tlâhpipa ta chhôhkha chyhpa ama châ hra.

Paritheipa ta eima chhôhkha a vaw ngiahnao tawhta cha nô nata paw ama luhpasasa hmeiseih ta, unawhzy nôpopa ta chhôhkha châta noza âchhihpa hleikhô ta chhôhkha raona a tlôkhei tyh. Bieble ta, “Atu ngâpa kychhina o hlâta cha aryh ngaitapa ta laochhohpa kawh kha niepa a pha via” (Bis. 17:1) a vaw tah. Paritheipa he hro pachhohsatuhpa, chhôhkha paraona, pho maohphyuhna, moleina torai âthaona châ thei ta, hezy tawhta eima chhôhkhazy eima pabohsa awpa abyuh hmeiseih.

Eima sawnahzy, hawtipa khiah maw eima tah nota pitlohpa pahnopa moleina chi hluhpi liata a vaw hra syulyu ha ei ta. Krizyhpa chhôhkha hluhpi liata sôh nata piah, duasu nata rôhnahnazy ta a pie thei leipa kyhpachâna zy, aryhna zy, âpahnothaina zy, hnatlâna zy, Thlahpa Pathaihpa liata lymâ zy a lei lymâ haw. Cha hawhta khizaw liata pahrâpa nô nata pawzy cha kheihta hroh awpa ma a châ aw? Sawzy he kheihta mohhôh ta chhorei awpa ma a châ aw? tahpa achu pasia ta pahno cheingei awpa eima châ tahpa a sia kaw.

4.9 Ahneipa pathaihpa ta ahnei awpa ta thyutliazy chhihthapa:

KTP Pakhypi maih ta palôhrupa liata â vaw lâ tyhpa nata KTP Member zy cheingei chhao ta eina pahneisa tyhpa cha eima hneina dâh report a châ tyh. Nôvah bao hluhpi dâh tawtawpa liata ahneipa ama châ nota reikhi ngâlâh ta Awnanopa Dâh pathaihpa ta ahneina a ypa he pachâchhie â chhih ngâsâ. Âthaona  âdo vei khia cha Krizyhpa chhôhkha phapa paduapa he a vaw rairu ha tyh. Chavâta âthaona chaipa ahneina he kuzô pha kawpa ta Awnanopa Dâh Pathaihpa cheingei ahnei awpa ta chhôhkha liata eima pasyu awpa â daih hmeiseih.

Ahneina he Khazohpa ryhraona châta, eima Biehrai liata ahneina hmiatua chaipa pachhuahpanohtuhpa cha Khazohpa a châ (At. 2:18-25). Âdâ cha â kaolâh awpa chyhsapa ei taopa tua aw tahpa ta Ivyh tao ta, Âdâ hnohta a chhi ta (At. 2:22). He liata ‘Âdâ hnohta a chhi’ tahpa he ahneina tahpa nahta alyupa a châpa hawhta athaipazy ta ama chhopasia. Cha ahneina hmâpa chata pôhpa miakha ama vaw châ haw.

Eima Biehrai ta ahneina a rei dâh cha, “Chavâta chapaw ta a nô nata a paw siesai aw ta, a lahpinô a patu aw; chatanachata pôhpa miakha ama vaw châ ha aw,” (At. 2:24; Mat. 19:5) tahpa a châ. He bie he nôvah baokha ahneina reina a dy. A yzie cha chyhsapa tloh leina vâta kaolâhpa pakha hlâta hluh viapa hneipa he alykheina hlâta cha chhôhkha liata buana pahluhsatuhpa deita tlao a châ.

Ahneina he azaona athu chaipa, sapa nata palôhrupa lâta alailyupa y leipa ta nôvah azaona a châ via. Lyuhchâpa Pawla chhochhi cha Khazohpa pahnona rôhnah pahchaipa nahta âlyupa ta tlao a reih hra. Khazohpa nata a chyhsazy azaona pakhona châta hmâpa a châ hra.

Ahneina heta a chakaihpa hluhpi, zi awpa nata a vaw pazi awpa pazai kawpa châ ta. Âthaona liata âlâpa nata pahno chiehpa dei châ leipa ta a chhiena lâta nata a phana lâta hmo hluhpi a vaw y chhyh tyh, cha chata nôvah apazaona he a chhiena lâ nata a phana lâta a vaw panano thei tahpa eima pahno ngâ thlâh ha awpa abyuh. Cha hawhta a châ vei khiatala nôtloh pawtloh châ hra tlôh ta chhôhkha maohphaona he eima phaoh pahnie lei pathlei aw tahpa chi âchhih kaw. Eima Beipa Zisu Krista pachuna tawahta cha nôvah cha achhaih lei awpa a châpa ta alyu. “Chavâta Khazohpa ta a pazao hapa cha chyhsa ta pachhaih khah se” (Mk. 10:6) tahpa ta eima hmô. Achhaih achhuahna he Khazohpa pazao hapa panano achhuahna a châ theipa vâta pha leipa ta. Achhaih thei awpa liata chhao achhaihna palôh phaoh leipa ta, adyhryh ngaitapa ta ypa he chhôhkha châta Khazohpa byhna thabypa a châ.

A rôhnah kawpa ta ahneina he chhôhkha hlaotlohpa paduana châ hlei leipa ta, nôvah likawh alynazy chhôhkha phapa eima padua nata padua leipa cha daihti ta tlao a vaw palâhâh awpa a châ. Nôvah aly kawpazy, palôhtlâhna hmeiseihpazy, reiraohna pha kawpazy, nôvah hro hlaotlohpazy he ahneina bietai eima rei khai pataw nahta hnei khai thlâh ha awpa châ hlei vei; a hmeiseihna râh liata achu awpa nata achuna chôta hriapapua awpa tlao a châ. Nôvah ahneina heta kyhpachâna ta a mohhôh leipa chhao ta a paw vaw pakai thlâh ha awpa hawhta eima pachâ khiatala â su aw vei; mohhôh leipa pawpi cha thlai lo ha tyh tlôh ta. Kyhpachâna he Khazohpa hropipa peimawh chaipa a châpa vâta ano ângiapatuhpazy chhao ta eima hlykhei hra awpa a châ. Chyhsapa chhaichhi pha chaipa hry liatapa a châpa vâta nôvah likawh liata chhao a peimawh chaina cha “Chahry pa-i pasiana” a châ tahpa ta Pawla ta a reih (Kao. 3:14).

Hmo peimawh kawpa cha, satlia laihsa nota hro a vao pha leipazy heta chhôhkha hlaotlohpa padua thei lih-lâ veih ei. Sôh nata piah, o nata lyu phapazy he chhôhkha pitlohpa châ hlei leipa ta, mohropa hneipa hawhta hnei theipa chhao he chhôhkha hlaotlohpa châ hlei hra vei. A peimawh chaipa cha Khazohpa chhôhkha paduapa lôbô a huary beih leipa ta a duahpa he a châ aw. Krizyhpa chhôhkha liata cha sôh ta ryureih leipa ta, Khazohpa ta ryu tlao a reih tyh.

4.10 Awnanopa pasâhsa ta pachâ peimawh awpa ta chhôhkha âpachupa :

Atahmâ khizaw hro liata hmo peimawh ngaitapa cha Awnanopa mohnaopa nata pachâ peimawh leina he a châ. Awnanopa biepuapa nata pachâdâhzy he eima za awpa a châ. Châhrasala atahmâ hlâ he Awnanopa eima pachâna dâh he a padâh kawpa hawhta âlâ. He he chhôhkha liata eima pachu hluh via awpa abyuh kaw. Awnanopa a mohhôhna nata siedâh he Khazohpa ta ngiapâtuhpazy âmohhôh nawpa ta mania a piepa a châ tahpa he khâ eima thei tyh awpa a peimawh kaw.

Awnanopa cha Khazohpa paduapa châ ta, Zisu Krista liata âpahniehpa nata Thlahpa Pathaihpa chhihthapa ta a hrohpa a châ. Eima Awnanopa biengiapâpa ta he hawhna heta Awnanopa a reih. “Awnanopa cha Khazohpa pakha liata Manôh Pathôh ypa ângiapâpa, Zisu Krista vâta Pachhana a totuhpazy hlao khata ypazy a châ. Py pathaihpa châ ta, khizaw moleina tawhta âpathaipa ta, hro nata chakaona liata Khazohpa chu biepi chaipa liata soh awpa ta awpa a châ…” He heta Awnanopa pathaihna nata zachhihna a reih pasia kaw.

Khazohpa he ano cheingei avypa ta eima hry liata ryureipa nata chakaopa ta hmô thei khao ma pi. Chavâta he khizaw liata ano vyuhpa ta Awnanopa padua ta. Eima Beipa Zisu Krista cheingei khata he Lôpanô chô liana heta ei Awnanopa ei padua aw (Mt. 16:18) a vaw tah. Lôpanô cha Krista châ ta, Awnanopa âpahniehna nata Awnanopa lôbô cha Krista a châ ( I Kaw. 3:11).

Awnanopa he Bei Zisu paduapa nata biehneina a piepa, athihpa khih ku ochhizy ta a ngâh lei (Mt. 16:18) awpa paduapa a châpa vâta zachhih ta, pasâhsa awpa a châ. Vârâh châbi a vaotuhpa nata chahrypa nata pathlâ theipa ta biehneina (Mt. 16:19) a hneipa vâta pachâ peimawh ta za awpa a châ. Awnanopa za leipa nata pachâ peimawh leipa chata Khazohpa chhao chi hlei hra vei.

Chhôhkha he Awnanopa thatlôna thabypa nata awnanopa zachhihna, pathaihna a chabatuhpa cha a châ. Chhôhkha liata eima pachu vei khiatala Awnanopa zachhihna nata pathaihna pahnopasia thei ma pi. Awnanopa he Khazohpa ta ano vyuhpa ta he alei liata ngiapâtuhpazy apôhpakhyna, chyhsa zydua châta Awnanopa pathaihpa a châpa vâta Awnanopa tao awpa nata maohphaona maniah piepazy he eima pachâ peimawh awpa nata eima pasâhsa awpa a châ. Awnanopa he Khazohpa vyuhpa ta eima hmopiepazy vaw dao ta, adaihna hawhta nata a phahnai theinazie hawhta a hmâhtuh awpa a châ. Mopathaihpazy ypakhyna awnanopa chi awpa nata za awpa ta chhôhtozy âpachu pathieh heih ei suh u.

Bie Tlâpakyuna:

Chhôhkha he Khazohpa ta athaona tawh rai ta a paduapa nata pachhuah- panohpa, biehneina nata maohphaona a piepa a châ. He Khazohpa paduapa chhôhkha he châ khai pi ta, miakha miakha ta eima chhôhkha chyuh he Khazohpa pachhuahpanohna sia kawpa hneipa ta paduapa sai eima châ. Khazohpa pachhuahpanohna liana heta eima chhôhkha chhao eima hlao hra. Khazohpa pachhuahpanohna pahno awpa nata hlao patloh awpa cha chhôh to heta thapi phia chyu ei sih la. Chhôhkha pachhuahpanohna pha hneipa ta chhôhkha apakhyna nata Khazohpa achhyna apakhyna pachâ peimawh ei sih la. Khazohpa hnohta hmozy piepa ta eima chhôhkha avyuna kyh liata aboh awpa awpa ta âpachuna chôta eima hriapapuapa nata ahmiepa ta khihsa ngâh ei sih la, chanô chapaw moleina nata paritheipa tawhta aboh awpa ta thapi phiapa ta, Awnanopa dâh pathaihpa cheingei ta lahpi –vahpa hnei thei awpa ta eima hrozy pathaih awpa ta chhôhkha âchhihtha lymana chôta Khazohpa pasâhsa ta pachâ peimawh awpa ta chhôhto âpachu tyh ei suh u. He hawhta eima taopa ta a châ khiatala Khazohpa byhna topa ta chhôhkha alypa nata pha ngâsâpa Krizyhpa chhôhkha phapa eima padua thei aw.

Reihpahmaoh awpazy:

  1. Chhôhkha châta ‘Âchhihthana Phapa’ eima tahpazy khâpazy ma reihpahmaoh ei sihla – Chhôhkha nie nata do, môna nata thyuna daihti âlyu leipa, hrozie âlyu thai leipa padyhryhsa he abyuh eima tah ma?
  2. Noto chhôhkha liata Khazohpa achhyna, chhôhkha apakhyna hnei theipazy kheihta lâthlôh pahmôpa ma a pha chaipa ta nama pahno?
  3. Khazohpa achhyna apakhyna he abyuh eima tah ma? He chôchâh liata chhôhkha ta rairuna eima tyhpazy khâpazy maw? A pathlâ thei nawpa ta hmahla awpa khâpazy maw?
  4. Khazohpa hnohta hmo piepa, suhrawh sukha piepa he atahmâ hlâta chhao apachu via awpa he abyuh eima tah ma?
  5. Paritheipa nata chano chapaw moleina tawhta chhôhkha eima boh thei nawpa dâh awpa reihpahmaoh ei sihla.
  6. Eima lapangiapa nata ahmiepa ta hroh awpa ta eima taopathi ngâh ma? Kheihpazy liata ma abyuh viapa ta eima pahno? Hmah thlai la thei awpa khâpazy maw?
  7. Avyuna tawhta abohna heta ngiapâna nata Krizyhpa hro liata kheihta thei a pahthei awpa eima pangiasa? Avyuna tawhta aboh awpa ta thapi phiana dâh reih khoh ei sih la.
  8. Khâpa vâta Dâh pathaihpa ta ahneina hlata Dâh tawtawpa nata a paryh chhyhpa ta ahneina he a hluh via thlâh ha chy? Dâh pathaihpa ahneipa nôvah hluh viapa eima hnei thei nawpa ta kheihta hmah awpa a châ aw, reihpahmaoh ei sihla
  9. Awnanopa he kheihta e eima pachâ, Awnanopa biepuapa nata dâh zy eima pachâ peimawh ma? Kheihta e atahmâ hlâta Awnanopa eima pasâhsa awpa nata za awpa ta eima pachu aw?
  10. Krizyhpa Chhôhkha bie he Awnanopa oto ta siepapuakhei dâh pha viapa pachâ awpa abyuh eima tah ma? Abyuhpa châ sala kheihta eima tao aw?
  11. Khizaw hmahsiena he maniah paraotuhpa ma, eima phakhei maw? Pachhaih ta achu pasia abyuh eima tah ma? A pakhona : internet, Cable TV, Mobile phone, etc.

Leave a Reply

Your email address will not be published. Required fields are marked *