Kristian Chhungkua by Rev. Chhuakhu Khithie

Introduction:

“Tangka in engkim a si thlu” tih hi tunlai khawvel ah chuan a dik hle mai. Chhungtin mai hi sum zangin kan hmanhlela, bible chhiar leh tawngtaia Pathian pawl hmanlo hian vartian atang a zan khaw tairek thleng hian sum zawng erawh chuan kan phe buai reng si a. chhungkua mamawh ber chu sum emaw kan ti ta mai niin a lang. Sum leh hausakna hi hlimna nise kan hlim thawm hi ring ve hle tawh awm a ni. Kan khawpui ah thil engkim mai a awm ve tawh, in ropui tak tak leh a chhung nuam tak tak kan sa a, a luahlumtu kana wm mumal silo. Kan in leh taksa te pawh mawi leh tunlai ber ber in kan chei a, kan kawtthler te pawh motor manto chi hrang hrangin kal hleih theih loh khawpin kan hnawh khat ta. He tih lai hian chhungkaw hlim thawm a daia, kan tuallai pawh mitam tak tan hmun raltiah kan siam ta a nih hi. Isua tel lovin inchhawng ropui tak tak kan sa a, a luahtu tur kan fate sualna hliam tuarin an keh chhe ta thung si a nih hi. Hetiang khawvel leh boruak karah hian chhungkua din thar tura hmathar kan lakna a min tan puitu a tan he thuziak hian kawng engemaw ti talin min pui thei se a va lawmawm dawn em!

1. Chhungkhaw Bul

Thuthlung hluiah:

Kan Bible atang hian chhungkaw dintu leh chhungkaw bulpui ber chu Pathian a nih thu a lang chiang hle. “Kan anpuiin, keimahni ang takin mirhing siam ila…” tih leh “Mihring amah chauha awm hi a tha love, amah tanpuitu tur a kawppui awm mi ka siam teh ang…” (Gen. 1:26, 2:18) tih te hian Adama ah Pathianin chhungkua bul a din a ni tih kan hmu thei. Chu chhungkaw tan chuan ruahmanna fel tak neiin thuneihna leh tih tur pawh a pe bawk a. “Tin, Pathianin anmahni mal a sâwm a: Pathian vêkin an hnênah, “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te,chunglêng sava chungah te, thil nung leia bawkvâka kal zawng zawng chungah te thu nei bawk rawh u,” a ti a.( Gen. 1:28) Heihian chhungtin mai hi Pathian din leh Pathian ruahmannaah an tel a, mawhphurhna a pekte kan ni vek a ni tih a ti lang a ni. He tiang taka ropui leh mawhphurhna sang tak nei hian Pathianin chhungkua chu a din ta a ni. Mahse Adama leh Evi chuan an chhungkua chu Pathian duh zawng a hruai lovin sualah an lo tlu ta a Pathian ruahman angin an awm zo talo a ni.

Pathian erawh a beidawng mai lova a thil tum tihlawhtling zel tur chuan Thuthlung Hluia Abrahama chu khawvel ata ko chhuakin chi ropui tak thlahtuah a ruat a. A thutiam ang ngeiin amah atang chuan chi ropui tak, Israel hnam, A chenna leh a duhzawng hlenchhuak tur Pathian chhungkua (Lalpa qahal) ah a siam ta a. A chenna tur leh a duhzawng khawvela puan chhuah hna thawktu tur chu a ni. Mimal tinte chu Amaha chenga, a thupekte pawm turin a ko a. “Pathian chuan mi malte chu chhungkaw zingah te a teltir thin a” (Sam 68:6) tih angin Zawlnei Amosa hnenah chuan “Nangni chauh hi khawvêla chhûngkua zawng zawnga ka hriat in ni a: chuvângin in khawlohna zawng zawngahte chuan ka hrem ang che u,” (Amosa 3:2) tiin a sawi a. An chhungkaw chunga lu ber leh roreltu, an khawlohnaah pawh hrem tur a nih a hriattir a ni.

Thuthlung tharah:

Thuthlung Tharah chuan Isua Krista avangin Israel thar, Kohhran chu thlaraua Ama chenna atan din a lo ni leh a. Chu Kohhran chu Pathian duhzawng khawvela puan hna thawk tura a din a ni. Chu Kohhranah chuan amah ringtu zawng zawngte chu pumkhat niin an cheng ho a. Krista lalna tinghet tur leh a chanchin tha puan darh chu a hna pui leh a din chhan chu a ni.

Chu Kohhran, Pathian chhungkaw ropui taka tel tur chuan Pathianin mihringte hnena leilung luahkhat tura a thupek angin, chhungkaw dinna atan mipa leh hmeichhia inneia chi thlah turin a ruat a. Chuta chhungkua rawn indin chhuak te chu A hming chawiin, “Kristian Chhungkua” tih a lo ni ta a ni. Kohhran, Krista taksa khan a member Kristian Chhungkua kha a zawm a. Kristian Chhungkua pawhin chu Kohhran chu zawmin vanram hmel tilang turin pumkhat rawngbawlhna chu a thawk a ni. Kohhran nihna famkim chu chhungkaw tha a lo pun ang zelin a hlawhtling dawn a ni.

2. Chhungkaw Pawimawhna

Chhungkua hi pawl ho (institution) zinga upa ber, Kohhran ai pawha upa, Eden huana Pathian ngeiin a din a ni tih kan sawi tawh kha. Bible chuan, “Pathian chuan mi malte chu chhungkaw zingah a teltir thin,” tiin min hrilh (Sam 68:6).Heta tang hian Pathianin chhungkua a ngaih pawimawhzia a lang hle.Kohhran pawhin chhungkua hi a ngai pawimawh a, puithu takin chhungkaw bul tan nan Inneih dan a buatsaih a, kan fate chu tha taka kan enkawl theih nan nu leh paten thutiam kan lak thlap hnuah nauhlan rawngbawlna a siam bawk a. Kan fate tan Sunday School leh Baptisma zirna min buatsaihsak a, kum 14 kan tlinin puithu taka Baptisma chan tirin Kohhran Dan chhungah min lawm lut bawk a. Hetiang taka Pathian leh a Kohhranin chhungkua a ngaih pawimawh lai hian chhungkuate hian kan pawimawhzia hi kan hre tawk lo hle niin a lang. Chhungkua hi engkim bul a ni a, chhungkua atanga tan dik loh chuan Kohhran leh khawtlang tha a awm thei lo a ni.

Thuthlung thar hun lai daih tawh khan Asia Minor ram (Turkey leh a chheh vel)-te khu Kristian an lo ni tawh a. Mahse kum zabi 6-na A.D vel lai khan khulai ramho khu Islam sakhaw zirtirna vuantu an ni zo leh ta a. A chhan chu Kristian hmasate kha thih thlenga rinawm in awm mah se, an chhungkuaah Kristianna an tuh nghet lo va, an thlah kal zelte chu Islam zirtirnain a hneh zo ta a ni. Sap ramah pawh Biak In tam tak a ruak tawh tih kan sawi lar hle a, an chhungkuaah Pathian thu an tuh nghet bik lo a nih a rinawm, chhungkaw keh chhia an tam ta a, an chhungkaw ruak chu Kohhranin a tuar a, an Biak In a ruak ta a ni. An Biak In ruak chauh kan sawi lar a, a chhan ber an chhungkaw ruak erawh chu kan sawi lar lo va. Keini ngei pawh hian chhungkaw pawimawhna kan thlahthlam vaih chuan kan Biak In tha tak takte hi luah lumtu nei lovin a la ruak lo vang tih sawi theih a ni lo.

Juda-te khu khawvela hnamah leh sakhuaah an chiang ber hnam an ni awm mang e, a chhan chu eng dang a ni lo va, an chhungkuaah Pathian thu an tuh ngheh tlat vang a ni ber. Mosia Danin a phut ang thlapin chhungkua an inenkawl a, sakhua leh hnam ziarang chhungkuah an inzirtir a (cf. Deut. 6 :4-9, 11:18-19 etc).William Barclay-a chuan, “ Juda nuho chuan Dan thu chu an hnutetui nen an fate an lem pawlhtir a, an fate chuan Dan thu theihnghilh ai chuan anmahni hming ngei pawh theihnghilh awl zawkin an hria a ni,” a ti hial a ni. Chhungkuaah an nghet a, an rinnaah an nghet a, an nghing ve mai mai lo.

3. Kristian Chhungkaw beihpui:

 Kristian Chhungkua tih tawngkam hi tunlaiin kan ramah hian a lar ta hle mai. Kohhran thenkhat ten kum rei tak ata tawh vawiin thlengin Kristian Chhungkua tih thupuia neiin campaign te nasa takin an lo bei tawh a, a sawt mawh hle nghe nghe a ni. Kan rama hmasawnna thang zel hian nun dan leh khawsakna te a sawi danglam nasa hle a. Hnathawh leh eizawnna hmun inang kawng kan zawh lai kha chuan inkaihhruai pawh a awl deuh thin. Tunah erawh chuan kan ram leh hnam hmasawnna avangin kawng dang zawh tur a lo tam tain mihring pawh kan inchen lo nuaih mai a, Chanchin |hain ramhuai hlauhna min umbosak tawh a. Tin, Pathian tihna leh hlauhna kan nei tlem leh lawi si a. Chuvangin Pathian pawh hlau lo, ramhuai pawh hlau lo, engmah hlauh nei lo angin tam tak chu kan khawsa ta a ni ber mai. India sorkar atanga kan ramin puihna a dawn leh a thlawna dawn theih te a lo tam ta a. Politics hriat dan dik tawk lo te avangin kan hnam chu thatchhiatna leh dawngdahna ten min man a. Ruihhlo chi hrang hrangte leh suahsualna dangten chhungkua a tibuai ta. Chuvangin, Pathian thua inkaihhruaina tha leh nghet chhung tinin kan neih a, tih takzeta tan kan lak theih nan helamah hian rilru kan pek tam a hun ta hle a ni.

ECM Assembly chuan tunlai khawvel thang zelah hian chhungkaw pawimawhzia hriain kum 2013 Assembly-ah, Family Guidance and Counselling lama hma kan sawn theih nan “Family Guidance and Counselling” din a rel a. He thurel bawhzuiin December 1, 2013 khan Family Guidance and Counselling Centre (FG&CC) chu hawngin bul tan a ni ta a ni. Kum 2014 Assembly in 2014 hi Kristian chhungkaw kumah a puang a, Kristian Chhungkaw din kawnga chhungkaw tin ten inkaihhruaina tha kan dawn theuh theih nan chak zawka hma la turin FG&CC hian mawhphurhna a la ta a ni. Kohhran tinte chu Kristian Chhungkaw Committee din tura ngen an ni ta a nih kha. Local Church tina Kristian chhungkaw committee-te chu FG&CC a in thlungkhawm leh thawkho tura beisei kan ni bawk a ni.

4. Kristian Chhungkaw tha din tura hma kan lak dan tur te:

          1)   Chhungkaw inkaihhruaina tha nei thei tura tan lak.

          2)   Chhungkaw inkhawm nei thei tura tan lak.

          3)   Pathian Biak Inkhawm ngai pawimawh tura in zirtir.

          4)   Sawma pakhat pe thei vek tura tanlak.

          5)   Hlemhletna sual laka fihlim tura inzirtir.

          6)   Thawhchhuah mila nun leh khawsak ngam tura zirtir

          7)   Mipat hmeichhiat sualna laka fihlim tura chhungkua zirtir.

          8)   Ruih theih thil laka fihlim tura chhungkua zirtir.

          9)   Inneihna thianghlima innei tura thalaite kaihhruai.

          10) Kohhran ngaisanga pawisa tura chhungkua inzirtir.

4.1. Chhungkaw inkaihhruaina tha nei thei tura tan lak:

Tunlaia harsatna neite zingah hian a tam ber chu nupa kar buaina leh harsatna neite, Fanau enkawlna kawnga harsatna neite, mimal nuna harsatna nei an ni tlangpui. Heng harsatna neite hian chhungkaw inkaihhruaina tha nei se heng harsatna hi an tawk lovin ka ring. Hetiang atang hian chhungkaw inkaihhruaina tha kan mamawhzia a lang chiang hle a ni.

Kawppui tur zawn thuah te, inneihna te, in leh lo din, ei in zawnna kawngah te chhungkua hian inkaihhruaina tha a mamawh em em a. Tin, chhungkaw hunbi neih hrang hrang; mut leh thawh hun te, chaw ei hun te, chhung inkhawm hun bi te mumal taka neihte hian kan inchhung khur theuhah malsawmna a thlen thin a ni.

Kan Bible-in “Inhruaina fing awm lohnaah chuan mite an tlu thin a, Remruat thiam tamnaah himna a awm.”(Thuf. 11″:14). a tih ang hian Chhungkaw inkaihhruaina tha leh ruahmanna felah chuan insual tur pawh an inrem thei a, inkaihhruaina tha lovah erawh chuan inrem sa pawh an intibuai fo thin a ni. Chhungkaw in kaihhruaina tha chuan tunah leh hun lo la awm turah hahdamna, nawmna leh hlimna nasa tak min thlen a. Chhungkaw member tinten an chanvo tur dik tak pawh an chang thin a ni.

4.2. Chhungkaw inkhawm nei thei tura tan lak.

Kristian chhungkaw lem hi ziak dawn ta ila, in leh lo ropui tak tak te, sum leh paite leh motor tha tak takte ziak lovin Pathian biaa chhungkua thingthi lai lem hi kan ziak awm e. chutiang bawkin Chhungkaw hlut lai ber min zawt ta sela, engtiangin nge kan chhanang? Chhungkuaa Pathian hmaa kan thingthi lai tak hi kan hlut lai ber a niin ka ring thin. Thufing pakhat chuan, “Chhungkaw tawngtaiho thin chu an chengho thin” (Family that prays togather, stay togather) a ti hial a ni.

Chhung inkhawm chu kan duh a, mahse chhuanlam chi hrang hrang siamin kan inkhawm hman lo thin a ni. Pathianin ni khatah darkar 24 min pe a, chuta tanga darkar chanve tal pawh ama tana pe thei lo chhungkuate hian tisual kan inti em ? A ven himna avangin rim takin hna kan thawk thei a, amah kan biak dawna kan peih lo tlat hi kan tidik chiah em ? Mizoram C.M hian kan chhungkua hi ni tinin min rawn be dawn ta sela, hman loh kan nei hauh lo vang a, kan inchhuang hle zawk ang. Chutih laia kan nunna vawngtu lei leh van Lalberin ni tina min pawl a duh a, kan be hman ve lo a nih chuan eng ang chhungkua nge kan nih le ? Nakin lawkah chhungkuate hian manganna vawrtawp kan tawh hunah chuan Lal Isua tho tho hi kan biak duh ber tur a ni leh si ang.

Kan ramah hian a hming maia Kristian kan tam em avang a ni mai thei, chhungkuaa Pathian biakna neih tul ti lo kan tam hle mai. Lawmthu sawi tur leh dil tur kan ngah tehlul nen chhungkuaa Pathian be tura hun rei lo te pek pawh kan thei lo a ni. Chutiang anih avangin chhungkuaa Naupang lo seiliante hi an ngaihtuahawm duh bik thin a. hangtharte sualnaah an tlu lut awl bik deuh a ni pawhin a lang. Tin, khawvel thilah pawh an tlan chak bikin nupui pasal zawn dan kawngah pawh khawvel takin an nung thin a ni. An thlah kal zel turte pawhin Pathian tihna nun an tlakchham a hlauhawm zual hle a ni.

Mi tinten kan chhungkua theuh hi Pathian biakna kawngah leh thil dangah kan thil zirna hmasa ber leh pawimawh ber a ni. Chhungkaw dintu chu Pathian a ni a. A enkawl zui a, malsawmnain a vur bawk thin. Hei vang hian chhungkuain Pathian hnena lawmthu sawi tur tam tak kan nei a ni. Mimal maia sawi aiin chhungkua ngeia sawi a tul. Boruak leh ni engte, hriselna leh ei leh in tur min pek te, kan mamawh tinreng mai hi a hnen atanga kan dawn anih avangin lawmthu sawi kan ba a ni.

4.3 Pathian Biak Inkhawm ngai pawimawh tura zirtir :

Kan nun khalh ngil tur leh kawng dik zawh tura min puitu tha ber chu Pathian biak ina kal hi a ni. Pathian biak inkhawmnaa tel aia ngaih pawimawh dang kan ngah ta lutuk hian kan chhungkua a pawt darh ta mek a ni. Pathian nena inzawmna dik kan neih theuh theih nan Pathian Biak Ina inkhawm uar tura tan kan lak a hun ta hle mai.

Kohhran inpawlhonaa tel te, Lalpa Ni serh thianghlim te, Amah be ho tura inkhawm te hi ringtu, Kristian te tih tur leh mawhphurhna a ni. Bible hmun tam takah Pathianin mihring a siam chhan chu amah fak leh chawimawi leh biak ani tih min hrilh. Zawlnei Isaia chuan, “Ka mi, ka thlante, mi fakna tilangtu tûra ka tana ka mi siamte chu,” (Isa. 43:20) tiin min hrilh. He Bible changah mai pawh hian mihring chu Pathian be tur leh fak tur a nih kan hmu a. A biak duh loh chuan siam a nih chhan a thelh a, a siamtu a do va, a sual a ni tih kan hre thei a ni.

Tunah hian chanchin tha avangin Pathian malsawmna kawng tam takin kan dawng a. Nimahsela chung malsawmna te chuan chhungkuaa thil tih ho dial dial te a tiharsa tial tialin chhungkaw nun pawh a ti chhe mek niin a lang. Kan eizawnna hna leh thil dang avangtein chaw ei ho theih hun te, zing thawh leh zan mut hunte thlengin min tidanglam ta a. Tin, Pathian malsawmna dang Computer, TV atangtein mahni Biak In programme aia hlimawm zawk leh hmuh chakawm zawk te, kan in lum ngei atanga kan hmuh theih tur a lo tam ta a. Chung chuan Pathian Biak inkhawm te min hlattirin inkhawm aia nuam zawk tih tur dangte avangin Pathian Biakna kan hlamchhiah phah ta a ni. Mahni chakna leh duhnaa hruaibo a awm chu Pathian huatzawng tak a lo nih si avangin kawng hrang hrangah Pathian kan ngaihsak lohna rah kan seng ta a. Kan ram hi a lo na ta a ni.

Tunlai hunah hian Pathiannia Pathian biaa kan inserh hranna pawt peng theitu kan hmachhawn tam ta hle bawk. Ei leh bar zawnna dang te, thian pawlhova interek duhna te a lian zel. Pathianni serh aia Weekend thlakhlelhna boruak a nasa tial tial bawk. Chhung tinte heng laka fihlim tura tan lak a hun ta hle mai. Pathian thuin “In nun hi fimkhurpui hle teh u” (Jer. 17:21) a tih hi hre thar le hang u. Kan nun a inthlak nasa ta si a.

 Tunlai hian Chhungkuaa Pathian biak in kawng zawh ngai reng reng lo; chhiat ni that ni chauhva Kohhran mamawh chhungkua kan awm ta. Mi thenkhat chu an dam laia Pathian be ngai hauh lo, an thiha an ruang chiah Kohhranin a inkhawmpuite kan ni ta nual mai. Sap ram Kohhran chauhzia kan sawi tawh a, anni chu kum sang chuang zeta upa an ni tawh a, kan Kohhran hi kum za kan ni ve dawn chauh va, hetianga kan inthlahdah chuan kum 500-a upa ni ve ta ila, eng nge kan an ang le ? Kan Biakin tam zawk hi kan khar tawh mailo ang maw. Chhungkaw tinten tan i la thar theuh vang u.

4.4 Sawma pakhat pe thei vek tura tan lak:

Ni tina kan khawsakna atan sum hi a pawimawh reng a, mi tinin sum hi kan duhin kan mamawh theuh bawk, a neih theih dan tur pawh kan zawng theuh a ni. Tumah hi sum ngaina tura zirtir kan ngai lova, kan nuna bet telsa a ni. A ngainat dan tur tawk inzirtir erawh kan mamawh hle thung. Tunlaiah sum hi chhungkaw dinchhuahna bul ber a nih laiin, chhungkaw chhiatna bul ber a ni bawk. A neituin a hmuh dan leh hman dan a zirin a chhe zawng leh tha zawnga a nun khawihtu a ni fo.

Kristian chhungkuate chu chhung inkhawm leh Biak Ina inkhawm mai bakah kan neih atangin sawma pakhat leh thilpek dang kan pe phal ngei tur a ni. Lal Isuan a Pa hnenah, “ Thil zawng zawng i ta apiang chu ka ta a ni a, ka ta chu i ta a ni e,” a ti a (Jh.17:10). Chhungkaw tinte hian Pathian hnenah, “I ta chu kan ta a ni e,” tiin a malsawmna dawn kan duhin kan beisei a. Chutih lai chuan, “Kan ta chu i ta a ni e,” tiin a malsawmna kan dawn atanga pek let ve hi har kan ti thin. Tawngkam ai chuan thil neih inpek hian kan peka nena kan inlaichinna a siam thuk zawk a, hmangaihna leh duhsakna lantirna a ni bawk. Pathian pawh hi tawngkamin be peih viau pawh ni ila, sawma pakhat tak ngial pawh pe phal lo chhungkua kan nih chuan amah nen kan inlaichinna chu a fiah tur angin a fiah thei lo vang. Chuvangin Kristian chhungkuate chu Pathian hnena thil kan pek bakah pawh kan thenawmte tan pawh kan thilphal tur a ni ang. Piangthar dikte chu an pianthar hmain mi uikawm tak pawh ni se, a pianthar hnuah chuan thilphal takin Pathian an pawl a, mi dangte tan malsawmna an ni thin.

Sakhaw tinte hi mahni biak pathian kan hriat dan ang theuhin kan nung. Thil pe ngai lo pathian biate chuan thilpek an ching ngai lova, keini Kristiante Pathian hi chu thil petu a nih avangin amah ringtu leh betute hi chuan a hnenah thil kan pe lo thei lo a ni. Pathian hnena thil pek hi engkim min petu Pathian duhzawng kan tawmpui theihna remchang ber a ni. Miin Pathian hnena thilpek sum leh pai a hlan avanga a hek thu sawi tur hria an van viau laiin, a hlawkna leh malsawmnaa Pathianin a vur let zawkzia sawi tur hria erawh an tam hle thung a ni. Tin, thilphalna hi Kristian ze dik tak a ni bawk. Petu hnena malsawmna thlen hi Pathian hnathawh, mihring rohlu ber a ni. Mi uikawmte hi khawvela mi hlim lo berte an ni thin. Mahni tana khawl khawma Pathian lama ngah si lo chu mi rethei an ni. Pathian hnena thil kan pek hi vana ro kan khawlkhawm theihna remchang a ni bawk. (Luka 12:33,34).

4.5 Hlemhletna sual laka Chhungkua fihlim tura inzirtir:

Sum leh pai umna avanga Lalpa leh chhungkua ngaihthah ching ten a chhe zawngin a rah an seng zel a ni tih hi i haider lovang u. Chutiang tih ching chhungkuaah fate an khawlo a, sum neih ho tak takin a riral leh thuai a, faten an nungchang an hlohin an chhe zo a, zu leh drugs ruih boruakin chhungkua a tihrehawm zo ta. Sum leh pai dik tawk lova la lutteah sum chu tam tial tial mah se an indaih lo tial tial tho. In leh lo a ropui tial tial a, mahse a chhunga nun a hahthlak telh telh. Ei leh in a tui tial tial a, kan chaw ei erawh a tui tial tial chuang lo a ni. Khawsak phunga nawmsak thlakhlelhna leh mi ta awh fo thinna te hian hlemhletna rilru min puttirin Pathian nena inthenna hial a thlen thin. “Mahni kut ngei hmangin hna thawk rawh u, …..engmah tlakchham in nei lo ang” (I Thes. 4:11,12) tia Pathian thuin min fuih hi Kristian Chhungkaw tinte thuvawn lo ni mawlh rawh se.

Hlemhletna hian min chiah hneh ta hle a ni ang, tawngkam lar takah kan hmang ta hial mai a, thil zahthlak tak a ni ta. Hei pawh hi chhungkaw inkaihhruaina fel lovin a hrin chhuah niin a lang. Pathian thu chuan, “Thlarau keimahnia a chentir chuan thik khawp hialin min duh a ni,” tiin min hrilh a (Jak. 4:5). Ringtute chuan thil dik lo kan tih palh pawhin keimahnia Pathian thlarau awm khan min thik tlat avangin kan inchhir zui lo thei lo. Kut tling lova sum la lut teuh teuh chunga kan la hlim viau thei a nih chuan Pathian thlarau thikna kan nei ve lo tihna a ni ang a, mi van duai ber kan ni ngei ang. Chuvangin Kristian chhungkuate sum lak luh leh thil neih dang reng rengte chu, “Heng hi Isua zara ka ta,” tih theih a ni vek tur a ni (cf. Thuf. 13:7,11; 15:16; 16:8; 20:21; 28:6; 30:8). Abrahama’n hlemhletna a duh lohzia kha entawn tlak tak a ni. Sodom lal hnenah khan, “ Lazai pakhat pawh i neih atangin ka la lo vang…Abrahama chu keima tihhausak emaw i ti dah ang e,” a ti hmiah mai a. Chumi zawhah chuan Pathianin a hnenah, “Abraham kei hi i phaw leh i lawmman nasa tak ka ni asin,” tiin a rawn be zui ta a nih kha (Gen. 14:23; 15:1).

Khawtlang sualna hian chhungkuaah zung a kaih zel thin. Chhungkaw inkaihhruaina tha loah chuan hlemhletna tih a ni fo bawk. Pathian phal loh ei ru hmasa bertu chu Adama te nupa an ni. Hlawk a hnekin an saruakzia chauh an hmuin, Pathian anchhia an phur zui zawk. Annania te nupa khan an hlep ruk an thih phah bawk a ni tih kha I hre reng ang u.

4.6 Thawhchhuah mila nung leh khawsa ngam tura inzirtir :

Kan thu bul tanna “tangkain engkim a si thlu…” tih khi tunlai chhungkaw tamberah chuan a dik mai awm mang e. Sum leh pai um lutukna avangin chhungkaw tam tak kan kehchhe mek a, hmasawnna hian rualawhna a rawn chhawm tel a, rual awhna chuan neih ve zel duhna – in leh lo, inchhungkhur bungraw changkang zawk duh belh zelna a rawn hring a, awh leh duh, it leh neih chaknain kan thinlung leh rilru a luahkhat a, kan lakluhin a daih bak awh leh it kan ngah chuan kan nunah thil tha lo leh bawlhhlawh min sengluh tira. Kan lakluh mila nun leh khawsak kan thiam thei ta lo a ni. Tlawmte a nung ngam, bat leh puk laka fihlim, nun phurrit laka chawl hahdam tura kan inpek a tul a ni. “Hna reng an thawk lova, an tei mai mai zawk thin a ni. Ngawi renga thawk tur leh anmahni chhang ei turin Lalpa Isua Kristaa chuan thu pein kan fuih a ni.” (II Thes. 3:11, 12) tih hi Pathian thu a ni. Thawhrimna chaw a tui ber a, lak luh mila nun a hlimawm thin a ni. Bible chuan “Thawk lo chuan ei pawh ei suh se” min ti a, Pathian hian buh changrum leh sa hian min chawm reng dawn lo. “Tlakchham an neih ngai loh nan hna tangkai thawka inhmang reng turin fuih la, an awm mai mai tur a ni lo.” (Tita 3:14) a ti zawk a ni.

Hmasawnna hian rualawhna a rawn chhawm a, rualawhna chuan taihma taka thawh chhuah aiin awlsam tak sum neih duhna a rawn hring a, lak luh mila nun leh khawsak kan thiam ta lo a ni. Sum hi a lak luhna lamin tawp chin (limit) a neih laiin kan hman duhna lamin chin tawk neilo (unlimited) a ni thung. “Pawisa hi chhiahhlawh tangkai tak a nih laiin hotu nunrawng tak a ni,” an ti. Chhiahhlawha hmang lova hotu atana hmangtu chu amah kha sum bawihah a lut thuai a, a neih tam poh leh a duham a zual thin. Bible chuan, “Tangka sum ngainatu chuan tangka sumah duh tawk a hmu lo vang,” tiin min hrilh a. Pawisa hi indaih tura siam a ni lo hrim hrim a ni.

Kristian chhungkuate chuan sum leh pai chungchangah hian thinlung dik kan put a tul tak zet a ni. Tirhkoh Paula chuan, “Hausaa awm dan ka thiam a, tlachhama awm dan ka thiam a, tlai leh riltama awm dan thuruk ka hre chhuak tawh,” tiin min hrilh a (Phil. 4:11). Kristian chhungkuate chu kan rethei deuh a nih pawhin retheia awm danin awm mai tur a ni a, kan lo harsa deuh a nih pawhin harsa a awm dana awm leh mai tur a ni a, chu chu lak luh mila nun leh khawsak dan thuruk chu a ni. Mahni neiha lungawi lote’n hlep ruk an duh a, thawk peih si lova a tui tui ei duhten ruk an ru thin. Chuvangin hausa leh retheia awm dan thuruk hi nei turin i inbuatsaih theuh vang u. Ram leh chhungkaw mahni tuh loh rah seng tum te, mahni silh loh fen tum te, thawh rim avang ni lova awlsam taka neih teuh tumte hi an ding chhuak ngai lo.

4.7 Mipat hmeichhiat sualna laka fihlim tura inzirtir:

Khawvel miropiui tam tak an lo tluk chhiat tawhna, chhungkaw tam tak kehchhiat chhan leh ram leh ra innghirnghona pawh thlen hial thei thiltih theihna ropui tak tia mithiam te’n an sawi thin chua Sex hi a ni. Kan ram hian helam kawnga inzirtirna kan tlak chham hle lain a ruk taka hmang sual erawh kan tam hle maithei a ni.

Pathianin mihring a siama inthlah pung turin a ti a nih kha (Gen. 1:28), chu chuan sex hi nupa kara thianghlim tak hmangaihna vawrtawp thlen dunna tura a siam a ni tih a ti lang. Sex kan sawi hian thianghlimna a keng tel tih kan hrelo fo, hei vang hian sex chungchang hi chhungkuaah kan sawi thei lova, inzirtirna lam pawh kan namnul mai a ang hle. Pathian min pek thil hlu tak hi thil tawp ber, sawi zahthlak, mualphonaah kan ngai ta a ni thei mai awm mang e. Sex chungchang information kan dawn te hi thalai tam ber hi chuan thiante (hrechiang biklo) hnen atangina ni tlangpui, chhungkua leh Kohhran atanga Kristian duhdana inzirtirna a awm miaulo a ni.

Sex chungchang kan ngaihdan dikloh chhan hi kan hriat tur dik tak zawk hre lova a then a zar chauh kan hriat vang a ni thei. Sex chungchang sawi kan zaka zahmawh ni tlata kan hriat a vang hian Pulpita sawi kan ngam lova, fate bula sawi chiah kan ngai bawk heklo, mahse he tih lai hian kan duh loh zawngin kan fate hian information kimchanglo tak a lo dawng bawk si a ni. Tunlai Media hrang hrangin a tarlam tak tak chu sex chungchang a ni awm e. kristian inzirtir dan mil lemlo zawnga tarlam a ni chawk bawk. Tleirawl rilru leh taksa sosan lai tak min runa mi tamtak an insum zolo thin a ni.

Tirhkoh Paula’n Rom khuaa mite hnenah, “Zu in buai leh zu ruia awm lovin, hur leh inngaih hmanga awm lovin,……….” (Rom 13:13) tiin a fuih a. Thuthlung Hlui leh Thar hun lai leh vawiin thlengin sualna langsar leh chhungkaw nghawng chhe bertu la ni reng chu ruihtheih thil leh mipat hmeichhiatna hmansual hi a ni reng. A tuartu pawh kan tam sawt hle. Hei hian mipat hmeichhiat chungchanga chhungkua inzirtir a inserh thianghlim tura infuih atul zia a ti lang a ni.

4.8 Ruihtheih thil laka fihlim tura chhungkua inzirtir :

Nawmchenna uar leh ei leh ina khawvel chen chakna a hluarin mi mal leh chhungkua pawh chu chuan min eichhe mek a. Hlimhlawp ngainat leh uarna a zual ta em em a ni. AIDS, mihringa natna lo bei lettu, that zo vektu natnate chu tu lakah mah a mikhual tawh lo va. Mi engemawtizat hian kan kai tih finfiah a ni ta. Heng aia tamdaih hi ruihhlo in min ti buai mek bawk a ni.

Kan rama ruih theih thil hmang diklotu kan thalai tam tak te hi chhungkaw kehchhia (Broken family) an tam ber an ti. Kum thuah pawh kum 15-30 inkar an ni tlangpui awm e. kum 30-50 inkar hian zu chauh an ti tlangpui bawk. Heng thalai rual te hi ei zawnna lamah hna neilo chhungte chawmhlawm an ni tlangpui bawk.

Ruihhloin kan chhungkua a luhchilh meuh chuan nu leh pa an kun tlawk tlawka, unaute mangangin chhungkua tan a zahthlak bakah chhiatna a thlen thin. Bible chuan “Insaul bur bura ruaithehna in ai chuan, inrem taka chaw thing bar khat eina a tha zawk.” (Thufingte 17:1) a ti a ni. Ruihhlo hi nun ti tawitu, chhungkaw kehchhiatna, hman mualphona, sual tinreng intanna a ni thei, heng lak atang hian kan chhungkua akn fihlim a va tul take m.

Kan fate, naupang emaw kan tih chhungin puitling hriat chi sualna tam takah an lo thangharh hman daih tawh a. Kristian chhungkaw tam takah sum leh pai, dinhmun leh ropuina ten a pek theih loh hmangaihna te, inremna te, inhriatthiamna te, hriselna te, Thlarau Thianghlima lawmna te a bo tial tial a ni. Chuti ang khawvela cheng nu leh pate chu eng anga nun tur nge? fate engtia enkawl leh zilh tur nge? tih zir nguna hre ngei tur kan nih a chiang ta a ni.

4.9 Inneihna thianghlima inneitura thalaite kaihhruai:

KTP Khawmpui apiang maia rilru a langlo theilo leh KTP memberte ngei pawh min ti nui thin chu kan inneih dan report hi a ni thin. Nupa tuak tamtak dante a innei an awm lain chhiar tham leka tlem Kohhran dan thianghlima innei an awm ve chauh mai hi a ngaituah awm hle mai. A bul tan dik loh chuan Kristian chhungkaw tha din hi a har fak tawh mai thin a ni. Chuvangin a bul ber inneihna hi kan uluka Kohhran dan thianghlim ngeia innei tura chhungkuaa kan in fuih a hunt a hle mai.

 4.10 Inneihna hi Pathian remruat a ni a, Kan Bible a inneihna hmasa ber buatsaihtu chu Pathian a ni (Gen. 2:18-25). Adama chu a kawppui awm mi ka siamsak teh ang tiin Evi a siam a, Adama hnenah a hruai ta a (Gen. 2:22). Heta ‘Adama hnenah a hruai’ tih hi a inneihtir tihna tluk niin mithiam ten an hrilhfiah thin. Chu inneihna hmang chuan tisa pumkhat an lo ni ta a ni.

Kan Bible in ineih a sawi dan chuan “Chuvangin mipain a nu leh pa a kalsan a ang a, a nupui a vuan ang; tichuan tisa pumkhat an lo ni tawh ang.” (Gen.2:24; Mat.19:5) tih a ni a. He thu hian inmal neih a kawk a ni. A awmziaah chuan mipa pakhat leh hmeichhe pakhat an innei ang, tihna a nih chu. Mihring chak lohna avangin kawppui pakhat aia tam neih hi hlimpui ai chuan chhungkuaah buaina ti tamtu mai a ni zawk.

Inneihna hi inlaichinna thuk ber, tisa lam leh rilru lama a bo a bang awm hlek lova nupa inlaichinna bik a ni. tirhkoh Paula phei chuan Pathian hriatna ropui bik nen ang khatin a sawi nghe nghe. Pathian leh a mite inlaichinna tehkhin nan a hmang bawk (Eph. 5:32).

 Inneihna hi ken tel ngah tak mai, zui tur leh thuihruai nei duah a mai a ni a. A tira lang leh hriat sa mai loh a chhe lam leh a tha lamah thil tam tak a lo awm chawp duah thin, chu chuan nupa inkungkaihna hi a chhe zawng leh a tha zawngin a tidanglam thei a ni tih hriatreng a ngai. Chutiang a nih loh chuan nutling patling ni ve si hian chhungkua hi phurhchhuah zawh loh mai awl tak a ni. Kan Lal Isua zirtirna atang chuan nupa chu inthen loh tur niin a lang. Chuvangin Kristian inneihna thuthlungah pawh inthenna a tel lo reng a ni. “Chuvangin Pathianin a zawm tawh chu mihringin then suh se” (Mat. 10:6) tiin kan hmu. Inthen tum hi Pathian zawm tawh tihdanglam tumna a nih theih avangin a fel lova. Inthen theih mainaah pawh Inthenna rilru pu lova, inngeih dial diala awm hi chhungkaw tan Pathian malsawmna bul a ni.

 Ropui taka inneih hi chhungkaw hlawhtling dinna a ni kher lova, nupa kara hlimnate chhungkaw tha kan din leh din loh chu hunin ala rawn pho chhuak mai dawn a ni. Nupa nu hlim tak te, lungawina tak tak te, tanrualna tha tak tak te, nupa nun hlawhtling tak te hi inneih thu tiam kan chham ruala neih nghal mai theih a nilo, a tak rama zir tur leh zir chunga thawhchhuah tur chi a ni zawk. Nupa inneih hian hmangaihna a enkawl loh pawha parmawi reng tura kan ngai anih chuan a fuh lovang, enkawl loh pangpar chu a chuai hma thin si a. Hmangaihna hi Pathian zepui pawimawh tak a nih avangin amah ringtute pawhin kan tawmpui ve tur a ni a. Mihring hmanraw tha ber te zinga mi a nih avangin nupa karah pawh hian a pawimawh lai ber “Phuar famkimna” a ni tiin Paula chuan a sawi hial a ni (Kol 3:14).

Thil pawimawh tak mai chu, nulat tlangval laia nun uluklo te hian chhungkaw hlawhtling an din mawh khawp mai. Sum leh pai, in leh lo thate hi chhungkaw puitling an ni ngawt lova, rualpawla mi neih ang apiang neih ve theih mai pawh hi chhungkaw hlawhtling an ni mai chuanglo. A pawimah ber chu Pathian chhungakaw din lungphum nghing ve ngailo a ding a ni ang. Kristian chhungkua ah chuan sumin ro a rel lova, Pathian rorelna a ni zawk a ni.

4.11 Kohhran ngaisanga pawisa tura chhungkua inzirtir

Tunlai nuna thil pawi tak mai chu Kohhran ngaih nepna leh pawisak lohna hi a ni. Kohhran thu chhuak leh ngaihdan te hi kan ngaipawimawhin kan zah tur a ni. Mahse tunlai hian Kohhran kan ngaihdan a dal ta hle in a lang hei hi chhungkua a kan in zirtir that a ngai hle mai. Kohhran in thununa leh kal phung te hi Pathianin ringtute in enkawl nana min pek a ni tih hi kan hriat thar leh a pawimawh a ni.

Kohhran chu Pathian din a ni a, Isua Krista a innghat leh thlarau thianghlim hruainaa nung a ni. Kan Kohhran thurin chuan hetiang hian Kohhran a sawi “Kohhran chu Pathian pakhata Minung Pathum a awm ring, Isua Krista avanga Chhandamna changtute hlawm khata awm khawm hi a ni. Pawl thianghlim a ni a, khawvel saulna ata intithianghlimin, nun leh rawngbawlnaah Pathian chu thupui bera dah tura koh chhuah a ni..” hei hian Kohhran thianghlimna leh zahawmna a sawi lang chiang hle a ni.

Pathian hi amah tak lo kalin kan zingah rorel leh rawngbawlin kan hmu thei tawhlo. Chuvang chuan he khawvela a ai awh turin Kohhran a din a ni. Kan Lalap Isua ngei khan He lungpui chungah hian ka Kohhran ka rem chho ang(Mat. 16: 18) a tih kha. Lungpui chu Krista a ni a, Kohhran innghahna leh Kohhran lungphum chu Krista a ni(I Kor.3:11).

Kohhran hi Lal Isua din leh thu neihna a pek mithi khaw kulh kawngkharte ngam loh (Mat.16:18) tura rem chhoh a nih avangin a zahawma ngaihsan tur a ni. Van ram chahbi kawltu leh phuar leh phelh theina thuneihna (Mat.16:19) a neih avangin pawisaka zah tur a ni. Kohhran zahlo leh pawisalo chuan Pathian pawh a hlau chuanglo a ni.

Chhungkua hi Kohhran chakna bul leh kohhran zahawmna, thianghlimna kenga vawng nung tu tur a ni. Chhungkuaa kan inzirtir loh chuan Kohhran zahawm leh thianghlim kan hre fuhlo fo thin a ni. Kohhran hi Lalpa’n a ma ai awha he leia ringtute inpawlho, mi zawng zawng tana Kohhran thianghlim a nih a vangin Kohhranin tih tur leh mawhphurhna min pekte hi kan ngaipawimawh in kan ngaihlu tur a ni. Kohhran hi Lalpa aiawha kan thilpekte lo dawngsawnga daihzai leh tangkai taka lo hmang tu tur a ni. Mithianghlim inpawl khawmna kohhran pawisa leh zah tur in chhung tin te hi inzirtir thar le hang u.

Thu tlangkawmna:

Chhungkua hi Pathianin a tir a atang renga a din leh ruahmanna, thuneihna leh mawhphurhna a pek a ni. He Pathian din chhungkua hi kan ni veka, a mal malin kan chhungkua theuh hi Pathianin ruahmanna fel tak neia min dinte kan ni theuh a ni. Pathian ruahmannaah hian kan chhungkua kan tel ve a ni tih hriain chu ruahhmanna hre tur leh ti hlawhtling tur chuan chhungkaw tinte hian tan la ila. Chhungkaw ruahmana tha neiin chhung inkhawm leh Pathianbiak inkhawm ngai pawimawh ila. Pathian hnena thil pek pe in kan chhungkua hlemhletna lakah fihlim tura inzirtir chungin kan thawhchhuah mila khawsak ngam ila, hmeichhiat mipat sualna leh ruih theih thil laka fihlim tura tan la in, Kohhran dan thianghlim ngeia nupui pasal nei thei tura nun vawng thianghlim tura chhungkua inkai hruai chung hian Pathian kohhran ngaisanga pawisa turin chhungkaw tin te inzirtir thin ang u. hetianga kan tih hian Pathian malsawmna changing chhungkaw hlim leh nuam Kristian chhungkaw tha kan din thei dawn a ni.

Sawiho turte:

  1. Chhungkaw tana ‘Inkaihhruaina tha’ kan tihte engnge ni sawiho ila – Chhungkaw ei leh in, mut leh thawh hunbi in ang lo te, nunphung inmil lo te siamrem tul kan ti em?
  2. Nitin chhungkuaa Pathian biakna, Chhung inkhawm nei thei lo ten an neih theih nan engtia kawhhmuh nge sawt bera kan rin?
  3. Pathian biak Inkhawm hi tul kan ti em? He mi chungchanga chhungkuain harsatna kan tawhte engte nge? A sutkian theih nana hma lakna turte engnge ni ang?
  4. Pathian hnena thilpek, sawma pakhat pek hi tun aia inzirtir uar zel tha kan ti em? Engtia tih nge kan thatpui ber ang?
  5. Ruihtheih thil leh mipat hmeichhiatna laka chhungkua kan filhim theih dan tur sawiho ila.
  6. Kan lakluh mila nung turin kan insiamtha ngam ang em? Engahte nge tul zual kan tih? Hma lak nghalna tur engnge ni?
  7. Hlemhletna laka fihlim hian rinna leh Kristian nunah engtiang takin nge rah chhuah a kan rin? Hlemhletna laka fihlim tura tan lak dan tur sawiho ila.
  8. Engvangin nge Danthianghlima innei aia dante leh sawirem chawpa innei kan tam zawk fo? Dan thianghlima innei nupa tuak tam zawk kan neih theih nan eng tianga hma lak nge tha ang sawiho ila.
  9. Kohhran hi engangin nge kan ngaih, Kohhran thu chhuak leh dan te kan ngaipawimawh em? Engangin nge tun aia Kohhran ngai sang leh zah turin kan inzirtir ang?
  10. Kristian Chhungkaw thu hi Kohhran in tina fehchhuahpui dan tha zawk ruahman tul kan ti em? Tul ta se engtinnge kan tih ang?
  11. Khawvel hmasawnna hi min tichhetu nge kan thatpui. Thliar chian tul kan ti em. Entir nan : internet, Cable TV, Mobile phone etc.

 

Leave a Reply

Your email address will not be published. Required fields are marked *