KPP Headquarters ta Chhôhkha Maihsâh Padua awpa ta Odyh to hnohta Châpaphao

Krizyhpa Paw Py (KPP), Headquarters, Siaha ta Executive Meeting biepathlupa hawhta ama py Headquarters pitlohpa paduapa a châ tawhta ama hmahlana hmiatuapa châta ECM odyh to (chhôhto) hnohta anaohna nata ama py biepipa (motto) “Kei nata ei chhôhkhazy heta la Abeipa eima chakao aw” tahpa a châna hawhta Chhôhkha Maihsah padua awpa ta ahawna cha a paphao.

He châpaphaopa he odyh to hnohta paphaopa a châpa vata 7800 copy chhuhpa a châ tahpa ta KPP Coordinator Pro. Pastor A.Zawngia ta a reih. He châpaphaopa he Marareih nata Mizo reih ta taopa châ ta, Mara Service Awnanopa chata Mara reih nata Mizo Service chata Mizo copy paphaopa ama châ. KPP Branch aduana liata cha KPP Branch zy ta vaw rai aw ei ta, cha hleikho ta odyh zy kiahpa ta chakaona chhao hneipazao hra awpa ta âhawpa ama châ hra. KPP adua mâh leina su liata cha Local Church liata bâh vaw buakhei awpa ta ahawna taopa ama châ hra.  A copy vaw hmoleipazy he Download Link liata sopa châ ta, vaw download ta vaw rai awpa ta a hawpa ama châ hra. KPP ta chhôhto hnohta a châpaphaopa cha he hawhta a châ:

EVANGELICAL CHURCH OF MARALAND

KRIZYHPA PAW PY

HEADQUARTERS, SIAHA

_____________________________________________________

A. 15011/6/2014-/KPP-ECM/8                                                                     Dated Siaha, the 15th October 2014

 

To

___________________________________

Krista liata Chakaolâhpa,

A hmiatua ta KPP Headquarters, Siaha vyuhpa ta eima Beipa nata Pachhatuhpa Zisu Krista moh ta eima châ naoh.

ECM Assembly nôpawzy khokheina nata chhihthana zawhzi ta atakô July thla liana khata KPP Headquarters liata chhihthana rai hria awpa ta chhihthatuhpazy atlyhna hneipa vaw châ ta, atahmâ cha KNP nata KTP zy hawhta yzie hnei viapa ta eima vaw chhihtha thei haw hra. He vâta eima Awnanopa nôpawpazy hnohta alyna bie hlâ hmeihseih pi ta, chavâta KPP paduana chhâpazy chhôhto pawhrâhpa nata nôhrâhpazy pahno awpa ta he châ he nâmo hnohta cha vaw paphao pi ta, kheihtarai châsala, eima châ hawna hlao maniah patlohkhei awpa nata hmah vaw la cheingei hra awpa ta eima Beipa Krista Zisu moh ta eima châ haw hra.

Rei hapa hawhta ECM Assembly ta KPP he maniah a pahnokheipa hleikhô ta, keimo he tha maniah patlô awpa a khoh ngaita. A chhâpa cha KPP heta py achhuahna biepipa (motto) hnei ta, cha cha “Kei nata ei chhôhkhazy heta la Abeipa na eima chakao aw” (Zawsua 24:15) tahpa a châ. He he eima biepipa nata achhuahna a châpa vâta chhôhto ta eima pahno awpa nata Chhôhkha Maihsâh padua awpa ta eimâ khokhei hmeihseih.

Atahmâ cha eima Khizaw hmahsiena nata thainazy thata a vaw sâh ta, moleinazy chhao â sâh ngaita kaw. Nibaw tluana kyh liata chhao khokheituhpa a hnei leipazy châta cha rai phapa hria awpa chhao hmo rairu ngaitapa a vaw châ haw. Eima sawnah duasuzy chhao a chhie ngaita kaw. He zydua pachâpa ta, keimo pawhrâhpa nata nôhrâhpazy heta maohphaona hnei pi ta; cha cha, keimo nata sawnahzy he khizaw moleina tawhta eimâ boh thei nawpa ta nata Abeipa byhnâ eima to thei nawpa ta eima chhôhkha chyu liata Chhôhkha Maihsâh padua ta, Abeipa khozie hawhta hroh awpa ta KPP Headquarters ta nâmo chhôhkha chhao a châ vaw haw hra.

Abeipa ta nama chhôhkha hnohta cha ypa ei sala, cha chhihtha ei sala, byhnâ cha pie mawh ei se.

Krista liata nama Chakaolahpa,

 

Sd/-                                                                                                                       Sd/-

(Pro. Pastor A.ZAWNGIA)                                                                                (J.B. CHOZAH)

Co-ordinator                                                                                                     President

Leave a Reply

Your email address will not be published. Required fields are marked *