“Adyhna Charei Mawh sy” Luka 2:8-14

L. Khaitlua

Mc. L. Khaitlua

By Mc. L.Khaitlua, New Colony

Adyhna he chyhsa mo to eimâ ngiah ngaitapa a châ. Khizaw sawhkhâ nano nanopa lyuhchâpa ta ama y tyhpa chhao he adyhna a y thei nawpa vâta a châ. UNO taihta â vaw duana chhâpa chhao he, khizaw liata adyhna a charei thei nawpa vâta a châ. Adyhna a y leina râh nata khihtlâh, chhôhkha liata cha rairuna nata atymâna a y tyh.
Reingiah-leina vâta Avâ nata Khizaw a chhai hapa vâta chyhsapa nata chyhsapa likawh lia chhao adyhna y thai khao vei. Chahawhpa a châ nota, Lei Mietahkuhvaihtuh penawh hnohta Vâ Hlapy zy ta adyhna hla rôhnah kawpa ama vaw paryh haw, Abeipa moh cha reithaipa ta y mawh sy. Amen. Zisu Krista a pih hlâ kô 700 rahchhôh ta, Hrohsopa Isaih ta “Adyhna Beipa tah aw ei ta” (Isaih 9:7) tahpa ta a vaw chho chhieliepa cha a vaw tlô haw.

Lyuhchâpa Pawla ta, “Ano cha eimâ dyhna châ tlô ta,” sapa lâta hmo zy cha pahlei khaipa ta, py no (2) zy cha pôhkha ta a tao, ama likawh chhôhpadâh zy cha phiepa ta (Eph. 2:5,15) tahpa ta a reih. Eima hmia ta liata Krismas eima kaw tlô awpa liata, Vâ Hlapy zy ta hla rôhnah kawpa ama paryh hapa eima sakhei thei hra nawpa ta he hawhpa ta apachhuahpanohpa a byuh.

1. Nôvah likawh adyhna charei mawh sy: Eima chhôhkha nochâ chyu liata, Nôvah he duahmo a sâh ngâsâpa a châ. Ahnei hlâta khihsa tôtu zy, saw zy mohhôh nawpa kyh zy nata a chhie a pha lia chhaota rairuna chatôh lymâ awpa eimâ ngiah thlâh bao nahta khazia e he hawhpa ta eima y khai ha tly? Krizyhpa chhôhkha eima padua lei vâta a châ thlyu nahta pangiasa â chhih. Chavâta, Nôvah likawh adyhna a charei thei nawpa ta Nôhrâhpa nata Pawhrâhpa zy eima duahmo awpa nata eima tao awpa do ngaitapa tao chyu awpa ta, Abeipa ta maniah â hnaw.

2. Chhôhkha liata adyhna charei mawh sy: Krizyhpa chhôhkha atahpazy pi heta adyhna Beipa a pih noh (Krismas) he kheihta e eimâ chhuahdy tyh tly? Nôpi-nôvah, saw zy likawh adyuna zy, unawh nata unawh likaw adyh thei leina zy he molei raihria vâta a châ. Eima chy nata sia, eima niebawpa nata apalypa-uasana kho tu vâta chhôhkha liata adyhna charei thei khao vei. Krizyhpa chhôhkha padua penawhzy ta cha ama chhôhkha liata adyhna ama chareisa. Chahawhpa chhôhkhazy cha uava amâ chhih ngaita.

3. Opa-lyuhri liata adyhna charei mawh sy: Chyhsa hluhpi cha khohlei khona vâta a hluh viapa ta khona zy, a kaw viapa ta khochhina zy vâta opa-lyuri penawh nata amo kho leina nata a hao amana zy a vaw y tyh. Eima o nata lyu a cha-ie chahmy lymâ pi ta, eima palôhrupa deikua a hla ngaita tyh. Bei Zisu Krista ta, “Chyhsa ta nama chô liata ama taopa nama khopa hawhta, chyhsa chô liata tao hra muh vy” (Mt. 7:12) a tah nota, opa-lyuhripa lâ liata ama kho lei awpa hmo eima tao tyh. Krizyhpa chhôhkha ta cha eima opa-lyuhri penawh chô lâ liata adyhna eima chareisa awpa a châ.

4. Awnanopa liata adyhna charei mawh sy: Thisaih ta chaleipa Awnanopa chhôhkha lia tlai chhao heta molei raihria vâta chhâchâna nata amo nata keimo tahpa a y tyh. Biedopa nata bie hmeihseihpa y thai khao vei. Paphô palyuhna, a daih-daona chhao pahno thai khao leina ta thata a khao a rei ha bâ. Khâpa no rai ta opposition party hawhta khâchâ a pachâpa eima hluh ngaita. Awnanopa liata adyhna charei thei nawpa ta, Krizyhpa chhôhkha tawhta eima pathao pathi heihpa a byuh.

5. Mohropa adyh awpa ta chakâ tua chai tyh: Lei nata vâ adyh heih nawpa ta Khazohpa cha a chakâ tua chai. Khazohpa nata adyh hapazy cha mohropa adyh awpa ta a chakâ tua chai awpa a châ. Mohropa ta maniah a vaw dyh awpa hâ thlâh leipa ta Bei Zisu nônaipa chysia a kypa ta adyhtuhpa châ chyu suh vy. Adyhna he pha tlô ta, mo to, chhôh to eimâ ngiah kawpa a châpa dei châ leipa ta Khazohpa nata eimâ dyh khiah ta cha, mohropa chô lâ chhaota eimâ dyh thei lei nawpa y vei. Khazohpa cha Adyhna Beipa châ tlô ta.

Leave a Reply

Your email address will not be published. Required fields are marked *